रावेत येथील स्मशानभुमीची दुरावस्था : महापौर राहूल

शहरातील 36 स्मशानभूमींचा करणार कायापालट

पिंपरी : पिंपरी-चिंचवड शहरातील 36 स्मशानभूमी, दफनभुमीची पाहणी केली आहे. त्यामध्ये दापोडीतील स्मशानभूमी चांगली असून उत्तम सोयी-सुविधायुक्त आहे. तर, रावेत येथील स्मशानभुमीची दुरवस्था झाली आहे. शहरातील स्मशानभुमीत सिमेंट काँक्रेटीकरण करण्यात येईल. उद्यान आहे की स्मशानभूमी आहे असा प्रश्‍न नागरिकांना पडेल अशा पद्धतीने स्मशानभुमीचा कायापालाट करणार असल्याचे, महापौर राहुल जाधव यांनी सोमवारी पत्रकारांशी बोलताना सांगितले. याबाबतचे धोरण करण्यासाठी लवकरच अधिकार्‍यांची बैठक घेणार असल्याचेही त्यांनी सांगितले.

शहरातील स्मशानभूमींची केली पाहणी

महापौर जाधव म्हणाले की, महापालिकेच्या शहरातील 36 स्मशानभूमी, दफनभुमीची स्थानिक नगरसेवकांसोबत पाहणी केली. त्यातील त्रुटी, समस्या जाणून घेतल्या. दापोडीतील स्मशानभुमीत सर्व सोयी-सुविधा आढळून आल्या. तर, रावेत येथील स्मशानभुमीत दुरवस्था आहे. तिथे रस्ता अरुंद आहे. त्यामुळे रस्ता रुंद करण्यात येईल. शहरातील सर्व स्मशानभुमीत पत्राशेड करण्यात येणार आहे. अत्यंविधीला येणार्‍या नागरिकांना बसण्यासाठी जागा करण्यात येईल. स्नानगृह, स्वच्छतागृह, विद्युतची व्यवस्था करण्यात येणार आहे. प्रदूषण कमी करण्यासाठी पर्यावरणपूरक विकसित करण्यावर भर देण्यात येणार आहे. मालकी हक्काच्या जागेत काही स्मशानभूमी आहेत. आरक्षणे ताब्यात घेऊन त्याचे हस्तांतरण केले जाणार आहे. स्मशानभुमीत जाण्यासाठी रस्ते प्रशस्त केले जाणार आहेत. डीपी रस्ते विकसित केले जातील. त्याठिकाणी गवत वाढले आहे. तेथील गवत काढण्यात येईल. कंपांऊड टाकले जाईल. पाण्याची सोय करण्यात येणार आहे. स्मशानभूमी विकसित करण्याबाबतचे धोरण केले जाईल. त्यासाठी लवकरच आयुक्तांसह संबंधित अधिकार्‍यांची बैठक घेण्यात येणार आहे. स्मशानभुमीचा कायापालाट करण्यासाठी आवश्यकता भासल्यास सल्लागार देखील नेमण्यात येईल.