राष्ट्रपती चैत्यभूमीला लवकरच भेट देणार

नवी दिल्ली : डॉ बाबासाहेब आंबेडकर यांचे चैत्यभूमी स्मारक तसेच नागपूरमधील दीक्षाभूमी आणि मध्यप्रदेशातील महू येथील भीमजन्मभूमी स्मारक येथे लवकरच आपण भेट देणार असल्याचे आश्वासन राष्ट्रपती रामनाथ कोविंद यांनी केंद्रीय राज्यमंत्री रामदास आठवले यांना शुक्रवारी दिले. नवनिर्वाचित राष्ट्रपती रामनाथ कोविंद यांची रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय राज्यमंत्री रामदास आठवले यांनी शुक्रवारी भेट घेऊन त्यांचे अभिनंदन केले. देशभरातील आंबेडकरी जनतेतर्फे शाल, पुष्पगुच्छ आणि भव्य पुष्पहाराने राष्ट्रपती रामनाथ कोविंद यांचा सत्कार आणि अभिनंदन केले. त्यावेळी अर्धा तास विविध विषयांवर उभयतांमध्ये चर्चा झाली.

डॉ. आंबेडकरांना करणार अभिवादन
देशाच्या सर्वोच्च राष्ट्रपतीपदी देशसेवा करण्याची आपणास संधी मिळाल्यामुळे डॉ. बाबासाहेब आंबेडकरांचे स्वप्न साकार झाले आहे. असे सांगत आपणास राष्ट्रपतीपदाची संधी मिळाली ती केवळ डॉ बाबासाहेब आंबेडकरांच्या सामाजिक क्रांतीमुळे असे मत राष्ट्रपती रामनाथ कोविंद यांनी व्यक्त केले. त्यामुळे लवकरच चैत्यभूमी दीक्षाभूमी आणि महू येथील भीमजन्मभूमी या भिमस्मारकांना लवकरच भेट देऊन डॉ बाबासाहेब आंबेडकरांना अभिवादन करणार असल्याचे राष्ट्रपतींनी आठवलेंकडे आपल्या भावना व्यक्त केल्या. यावेळी दलित आदिवासी बहुजनांच्या आर्थिक सामाजिक उत्थाणासाठी उभयतांमध्ये चर्चा झाली.

आंतरराष्ट्रीय बौद्ध धम्म परिषदेत राष्ट्रपती राहणार उपस्थित
अनुसूचित जातीजमातींना नोकरीत पदोन्नतीमध्ये आरक्षण मिळावे यासाठी प्रयत्न करावेत अशी मागणी रामदास आठवले यांनी राष्ट्रपतींकडे केली. तसेच येत्या डिसेंबरमध्ये आंतरराष्ट्रीय बौद्ध धम्म परीषद भारतात आयोजित करण्यात येणार आहे. त्यास राष्ट्रपतींनी उपस्थित राहण्याचे निमंत्रण आठवलेंनी दिले. ते निमंत्रण राष्ट्रपतींनी स्वीकारले असून त्यानुसार आंतरराष्ट्रीय बौद्ध धम्म परिषदेचे संयोजन करण्यात येणार आहे.