राष्ट्रवादीचे आमदार प्रकाश गजभिये ‘हेमंत करकरे’ बनून विधानसभेत

मुंबई : राष्ट्रवादी काँग्रेसचे आमदार प्रकाश गजभिये विधिमंडळ अधिवेशानादरम्यान शासनाच्या निषेधार्थ वेगवेगळ्या वेशभूषा करतात. मागील वर्षी ते भिडे गुरुजींच्या वेशात विधानभवन परिसरात दाखल झाले होते. दरम्यान आज ते विधानसभेत शहीद पोलीस अधिकारी हेमंत करकरे यांच्या वेशात दाखल झाले. पोलिसांच्या वेशात आमदार गजभिये आल्यामुळे सुरक्षा रक्षकांनी त्यांना हटकले. त्यावरून चांगलात राडा झाला. ‘करकरेंना प्रज्ञा मारू शकत नाही’ असा संदेश देणारा फलक गजभिये यांनी यावेळी फडकवला. पोलिसांनी अडवल्यानंतर ‘हेतू साध्य झाला’ असे म्हणत अखेर फोटोसेशन करून गजभिये तिथून निघून गेले.

लोकसभा निवडणूक २०१९ च्या प्रचाराच्या रणधुमाळीत, मालेगाव बॉम्बस्फोटातील मुख्य आरोपी साध्वी प्रज्ञा सिंह ठाकूर यांनी ‘करकरे यांनी मला विनाकारण मालेगाव बॉम्बस्फोटात गोवले. त्यांनी मला प्रचंड यातना दिल्या. त्यांचा मृत्यू त्यांच्या कर्मामुळेच झाला. मी त्यांना तुमचा सर्वनाश होईल, अशा शाप दिला होता. तो अखेर खरा ठरला’, असे वक्तव्य केले होते. त्यानंतर त्यांच्यावर देशभरातून टीका झाली. यावर, भाजपालाही ‘ते साध्वी प्रज्ञा यांचे वैयक्तिक मत आहे. आम्ही आजदेखील हेमंत करकरे यांना शहीदच मानतो’ असं पत्रक प्रसिद्ध कराववे लागले होते.