राष्ट्रवादी काँग्रेसमध्ये प्रशांत हिरे, अपूर्व हिरेंचा प्रवेश

नाशिक : नाशिकमध्ये भाजपला मोठा धक्का बसला असून प्रशांत हिरे आणि अपूर्व हिरे यांनी शुक्रवारी राष्ट्रवादी काँग्रेसमध्ये प्रवेश केला. राष्ट्रवादीचे अध्यक्ष शरद पवार, नाशिकचे आमदार छगन भुजबळ आणि प्रदेशाध्यक्ष जयंत पाटील यांच्या उपस्थितीत त्यांनी राष्ट्रवादी काँग्रेसमध्ये प्रवेश केला. नाशिकमध्ये हिरेंचं मोठं प्रस्थ मानलं जातं. नाशिकच्या कसमादि पट्ट्यामध्ये या हिरेंच्या राष्ट्रवादी काँग्रेसमधल्या प्रवेशामुळे भाजपला मोठा फटका बसण्याची शक्यता आहे. विशेषत: प्रशात हिरेंच्या रुपाने मोठं नुकसान होण्याची शक्यता असून कसमादि पट्ट्यामध्ये अपूर्व हिरे यांच्या रुपाने राष्ट्रवादी काँग्रेसला आमदारकीसाठी तगडा उमेदवार भेटला आहे.

कोण आहेत हिरे?

हिरे कुटुंबियांनी शिक्षण संस्था आणि इतर माध्यमातून स्वत:चं एक वेगळं प्रस्थ नाशिकमध्ये निर्माण केलं आहे. विशेषत: कळवण, सटाणा, मालेगाव, दिंडोशी या कसमादि पट्ट्यामध्ये अपूर्व हिरे आणि प्रशांत हिरे यांची ओळख आहे. मात्र, यंदा भाजपकडून सीमा हिरेंनाच उमेदवारी दिली जाण्याची चिन्ह दिसत असल्यामुळे या दोघांनी राष्ट्रवादी काँग्रेसचा मार्ग पत्करला आहे.