राष्ट्रीय अजिंक्यपद कबड्डी स्पर्धेत रिशांक, सायली करणार नेतृत्व

मुंबई । हैदराबादमध्ये 31 डिसेंबरपासून रंगणार्‍या राष्ट्रीय कबड्डी स्पर्धेसाठी महाराष्ट्राच्या पुरुष आणि महिला संघाची निवड करण्यात आली आहे. महाराष्ट्राच्या 15 जणांच्या पुरुष संघाचे नेतृत्त्व मुंबई उपनगरचा रिशांक देवाडिगा करणार आहे. महिला संघासाठी ही जबाबदारी मुंबई उपनगरच्याच सायली जाधवकड सोपविण्यात आली. गतवर्षी झालेल्या 64व्या राष्ट्रीय स्पर्धेत दोन्ही संघ तिसर्‍या क्रमांकाचे मानकरी ठरले होते. प्रो कबड्डी लीगमध्ये पूर्वी यू मुंबाकडून खेळणारा रिशांक देवाडिगा मागील मोसमापासून यूपी योद्धा संघाचे प्रतिनिधित्त्व करत आहे. या स्पर्धेत 31 संघ सहभागी होणार असून सहा दिवस ही स्पर्धा रंगणार आहे. गचीबोवली इनडोअर स्टेडियममध्ये 31 डिसेंबरपासून सामन्यांना सुरुवात होईल. स्टार स्पोर्ट्सवर या स्पर्धेचे उपांत्यपूर्व फेरीपासूनचे सामन्यांचं प्रक्षेपण होणार आहे.

महाराष्ट्राच्या संघात दोन मुंबईकर खेळाडूंचा समावेश करण्यात आला आहे. मुंबई शहरातून अजिंक्य कापरेची तर मुंबई उपनगरातून कर्णधार रिशांक देवाडिगा निवड झाली आहे. 23 वर्षीय अजिंक्य कापरे हा मुंबईतील विजय क्लबचा अष्टपैलू खेळाडू आहे. प्रो कबड्डी लीगच्या चौथ्या मोसमात अजिंक्यची तेलुगू टायटन्स संघात निवड झाली होती. या स्पर्धेत सचिन शिंगाडे आणि गिरीश एर्नाक हे दोन डिफेंडर प्रो कबड्डी लीगमधील अनुभव पणाला लावतील. याशिवाय यू मुंबाचा नितीन मदने आणि निलेश साळुंके यांच्याकडूनही चांगल्या कामगिरीची अपेक्षा आहे. पुरुषांच्या संघात पुण्याचे तीन, तर कोल्हापूर, ठाणे, सांगली यांचे प्रत्येकी दोन खेळाडू या संघात आहेत. महिलांत मात्र उपनगरने बाजी मारली आहे. त्यांचे चार खेळाडू या संघात आहेत. त्या खालोखाल पुण्याचे तीन खेळाडू या संघात आहेत. नुकत्याच कराड- सातारा येथे झालेल्या निवड चाचणी कबड्डी स्पर्धेतून हे संघ निवडण्यात आले आहेत.

संघ खालील प्रमाणे.
पुरुष संघ:- 1)रिशांक देवाडीगा – संघनायक ( मुं. उपनगर),2)विकास काळे (पुणे),3)सचिन शिंगाडे (सांगली),4)गिरीश इरनाक (ठाणे), 5)विराज लांडगे (पुणे), 6)नितीन मदने (सांगली), 7)तुषार पाटील (कोल्हापूर), 8)निलेश साळुंखे (ठाणे), 9)ऋतुराज कोरवी (कोल्हापूर), 10)सिद्धार्थ देसाई (पुणे), 11)अजिंक्य कापरे (मुं. शहर), 12)रवी ढगे (जालना),
प्रशिक्षक :- डॉ. माणिक राठोड (औरंगाबाद), व्यवस्थापक :- फिरोज मुल्ला पठाण (सातारा).

महिला संघ :- 1)सायली जाधव – संघनायिका (मुं. उपनगर), 2)स्नेहल शिंदे (पुणे), 3)सायली केरीपाळे (पुणे), 4)अभिलाषा म्हात्रे (मुं.उपनगर), 5)कोमल देवकर (मुं.उपनगर), 6)ललिता घरट (रत्नागिरी), 7)सुवर्णा बारटक्के (मुं.शहर), 8) पूजा के. पाटील (कोल्हापूर), 9)तेजस्वी पाटेकर (मुं.उपनगर), 10)आम्रपाली गलांडे (पुणे), 11)पूजा आर. पाटील (पालघर), 12)शुभांगी वाबळे (अहमदनगर). प्रशिक्षक : राजेश ढमढेरे (पुणे), व्यवस्थापक : अंबादास गायकवाड (सोलापूर).