रिक्षाचालकाची गळफास घेऊन आत्महत्या

जळगाव। शहरातील गणेश वाडी परिसरात रिक्षाचालकाने राहत्या घरी दोरीच्या सहाय्याने गळफास घेवून आत्महत्या केल्याची घटना बुधवारी सायंकाळी 6 वाजेच्या सुमारास उघडकीस आली. दरम्यान, याप्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली असून विनोद फकीरा राक्षे (वय-38) असे मयत व्यक्तीचे नाव आहे. विनोद राक्षे हे गणेश वाडी परिसरात पत्नी व मुलगा, मुली सोबत राहत होते. तर नेरी नाक्याजवळ रिक्षाचालवून आपल्या कुटूंबाचा उदनिर्वाह करत होते. बधुवारी विनोद यांच्या तुकाराम वाडीत सासर्‍यांचे उत्तरकार्य असल्याने त्यांच्या पत्नी व मुले तेथे गेले होते. त्यामुळे विनोद हे घरी एकटेच होते.

सायंकाळी विनोद यांच्या साडूचा मुलगा हा त्यांना बोलविण्यासाठी गणेशवाडीत आल्यानंतर त्याला विनोद हे गळफास घेतल्याचे दिसून आले. त्याने आरडा-ओरडा करीत तुकाराम वाडीकडे धाव घेत नातेवाईकांना घटेनची माहिती दिली. यानंतर कुटूंबियांनी गणेश वाडी गाठत विनोद यांना खाली उतरविले. यावेळी नातेवाईकांनी एकच आक्रोश केला होता. रात्री विनोद यांचा मृतदेह शवविच्छेदनासाठी जिल्हा सामान्य रूग्णालयात दाखल करण्यात आला होता. त्यावेळी नातेवाईकांनी एकच गर्दी केली होती.