रिक्षाचालकासह दोघांचा अल्पवयीन मुलीवर अत्याचार

एमआयडीसी पोलीस ठाण्यात गुन्हा दाखल ; रिक्षाचालक पसार, त्याचा साथीदार मित्र अटकेत

जळगाव : कुसुंबा गो शाळेत फिरायला जायचं असल्याचे सांगून 17 वर्षीय अल्पवयीन तरुणीला रिक्षात बसविले. तेथून परततांना अयोध्यानगराकडे एका शेतात, रिक्षाचालकासह त्याच्या साथीदाराने अल्पवयीन मुलीवर आळीपाळीने रिक्षातच शारिरीक अत्याचार केल्याची घटना समोर आली आहे. याप्रकरणी एमआयडीसी पोलीस ठाण्यात गुन्हा दाखल होताच, पोलिसांनी रिक्षाचालकाचा साथीदार संशयित प्रकाश सुरेश नागपुरे (22, रा.अशोक किराणाजवळ, रामेश्वर कॉलनी) यास अटक करण्यात आली असून रिक्षाचालक फरार आहे.

• रिक्षाचालकाने मुलीला दाखविले लग्नाचे आमिष
• -सूत्रांनी दिलेली माहिती अशी की, पीडित तरुणी व रिक्षा चालक गणेश तसेच त्याचा मित्र प्रकाश हे तिघं दहा वर्षापासून एकमेकांना ओळखतात. रविवारी दुपारी गणेशने मोबाईलवर संपर्क साधला. व तरुणीला बोलावले. ओळखीत असल्याने वडीलांनीही मुलीला गणेशासोबत बाहेर जायला परवानगी दिली. त्यानंतर गणेश व प्रकाश या दोघांनी कुसुंबा गो शाळेत नेले. कुसुंबा गो शाळेत एक तास थांबल्यानंतर तिघं तेथून अयोध्या नगराकडे एका शेतात रिक्षा घेऊन गेले.
• -याठिकाणी गणेश याने तु माझी गर्लफ्रेंड आहे, तू मला खूप आवडते, मी तुझ्यासोबत लग्न करणार आहे असे म्हणत रिक्षातच तरुणीवर जबरदस्तीने अत्याचार केला. त्यानंतर प्रकाश यानेही रिक्षातच अत्याचार केला. यावेळी त्याला नकार देत असताना मोठमोठ्याने तरुणीने आरडाओरड केली, मात्र जवळपास कोणीच नसल्याचे उपयोग झाला नाही. हा प्रकार झाल्यानंतर दोघांनी तरुणीला परत घरी नेऊन सोडले. घरी गेल्यावर पीडितेने झाल्याप्रकाराची माहिती आई, वडीलांना दिली.

मध्यरात्री उशीरा झाला गुन्हा दाखल
पीडित तरुणी व तिच्या पालकांनी एमआयडीसी पोलीस स्टेशन गाठून तक्रार दिली. स्थानिक गुन्हे शाखेच्या सहायक निरीक्षक नीता कायटे यांनी फिर्याद घेतल्यानंतर मध्यरात्री दीड वाजता गणेश व प्रकाश या दोघांविरुध्द गुन्हा दाखल झाला. याची माहिती मिळताच गणेश शहरातून फरार झाला. तर त्याच्या साथीदार प्रकाश नागपुरे यास उपनिरीक्षक विशाल वाठोरे, विशाल सोनवणे, सचिन मुंडे, गोविंदा पाटील व भूषण सोनार यांच्या पथकाने रविवारी रात्री दोन वाजता अटक केली. सोमवारी दुपारी न्यायालयात हजर केले असता त्याला पोलीस कोठडी सुनावण्यात आली.

जामीनावर सुटला अन् पुन्हा बलात्काराचा गुन्हा
प्रकाश नागपुरे याच्याविरुध्द याआधी देखील बलात्काराचा गुन्हा दाखल आहे. या गुन्ह्यात त्याला नुकतान जामीन झाल्याची माहिती पोलिसांनी दिली. जामीनावर असताना त्याने पुन्हा तोच गुन्हा केला. आता बलात्कारासह बाललैंगिक अत्याचाराचा गुन्हा दाखल झाला आहे. या गुन्ह्याचा तपास उपनिरीक्षक विशाल वाठोरे व सचिन मुंडे करीत आहेत.