रिमोट आमच्याकडेच!

पुण्यात नितेश राणेंचे वक्तव्य

पुणे : नारायण राणे यांच्याकडे रिमोट कंट्रोल असून ते राज्याच्या विरोधी पक्षनेतेपदाचा निर्णय योग्यवेळी घेतील, असे नारायण राणे यांचे पुत्र व काँग्रेसचे आमदार नितेश राणे म्हणाले. पुण्यातील दगडूशेठ हलवाई गणपतीचे सहकुटुंब दर्शन त्यांनी रविवारी घेतले. विरोधी पक्षनेतेपदाचा निर्णय नारायण राणेंवर अवलंबून आहे. राणे हे रिमोट कंट्रोल असून ते योग्य वेळ येईल तेव्हा चॅनेल बदलतील, असे नितेश म्हणाले.

लवकरच पुढील निर्णय
देव जो आशिर्वाद देईल, तो मान्य करु. महाराष्ट्राचे आणि जनतेचे संरक्षण करण्यासाठी आम्हाला शक्ती दे, असे साकडे देवाला घातल्याचे त्यांनी सांगितले. तसेच पुढील राजकीय वाटचालीबद्दल लवकरच निर्णय जाहीर करणार असल्याचेही नितेश यांनी सांगितले. 25 तारखेला नारायण राणे त्यांची पुढील भूमिका जाहीर करणार, अशी कुठलीही बातमी आमच्यापर्यंत पोहचली नसल्याचेही नितेश राणेंनी स्पष्ट केले. भाजपच्या कोअर कमिटीचा निर्णय ही अंतर्गत भूमिका असल्याचेही ते म्हणाले.

नितेश अद्यापही काँग्रेस आमदार
तुम्ही काय माझी हकालपट्टी करता, मीच काँग्रेस सोडतो, असे काँग्रेसला सुनावत नारायण राणे यांनी विधानपरिषद आमदारकी आणि काँग्रेसच्या सर्व पदांचा राजीनामा दिला होता. या पत्रकार परिषदेत राणेंसोबत फक्त त्यांचे ज्येष्ठ चिरंजीव निलेश हेच उपस्थित होते. त्यांचे दुसरे चिरंजीव आणि काँग्रेसचे आमदार नितेश राणे मात्र गैरहजर होते. त्यामुळे नितेश राणेंची नेमकी भूमिका काय?, राजीनामा कधी देणार यावरुन सध्या जोरदार चर्चा रंगली आहे. तसेच नारायण राणे नवा पक्ष स्थापन करणार की भाजपमध्ये प्रवेश करणार, याबाबत अद्यापही प्रश्नचिन्ह कायम आहे.