रिले सिंगिंगसाठी 300 गायक एकवटले

मुंबई – पद्मश्री डॉ. तात्याराव लहाने यांच्या जीवनपटावर आधारित डॉ. तात्या लहाने… अंगार पॉवर इज विदीन! या सिनेमातील रिले सिंगिंग या उपक्रमामुळे सिनेमाबाबतची उत्कंठा अधिक वाढली आहे. चक दे प्रॉडक्शनच्या या सिनेमाची निर्मिती आणि दिग्दर्शन विराग मधुमालती वानखडे यांनी केले आहे. त्यांच्या बहुचर्चित रिले सिंगिंगसाठी महाराष्ट्रातील कानाकोपर्‍यातून अनेक गायकांची निवड करण्यात आली आहे. मुंबई/ठाणे(125), पुणे (18), नाशिक(12), सांगली(7), धुळे(20), जळगाव(30), जालना(6), अकोला(11), अमरावती(17), नागपूर(11), वाशिम(15), लातूर(16), परळी(2), कोल्हापूर(8) असे सुमारे 300 गायक रिले सिंगिंगच्या सरावासाठी खारघर येथील येरला वैद्यकीय महाविद्यालयात नुकतेच एकत्र आले होते.

डॉ. लहाने यांच्या कारकिर्दीला मानवंदना देण्यासाठी सात वर्षाच्या कावेरी सुरवाडकर(जळगाव) पासून ते 70 वर्षांचे निवृत्ती वानखेडे(नाशिक) अशी 300 गायकांची फौज सज्ज झाली आहे. मुंबईतील षण्मुखानंद सभागृहात 16 ऑगस्ट रोजी रिले सिंगिंगचे रेकॉर्ड प्रत्यक्षात होणार आहे. त्याची नोंद घेण्यासाठी गिनीज बुक ऑफ वर्ल्ड रेकॉर्डचे पदाधिकारी येणार आहेत. काळोखाला भेदून टाकू…जीवनाला उजळून टाकू!… विराग यांनी लिहिलेले 108 शब्दांचे हे गाणे तब्बल 300 गायक गाणार असून सलग 3 वेळा सूर, ताल आणि लय यांची सुसूत्रता ठेवत एक शब्द एक गायक या पद्धतीने हे गाणे सादर होणार आहे आणि त्यामुळेच हा प्रयोग नेमका कसा यशस्वी होईल याबद्दलची उत्सुकता नक्कीच वाढली आहे. विराग यांच्या कठोर परिश्रमातून साकारला जाणारा हा सिनेमा 8 सप्टेंबर रोजी प्रेक्षकांच्या भेटीला येणार आहे.