रिव्हॉल्वरला परवानगी आमदार, खासदारांमार्फत!

मुंबई:- अंधेरी व डोंबिवली परिसरात परवाना शस्त्राद्वारे हत्या करून झालेल्या खुनाची चौकशी सुरू आहे. दोन्ही गुन्ह्यात ११ आरोपी न्यायालयीन कोठडीत आहेत. याविषयी आज, विधानसभेत प्रश्नोत्तराच्या तासाला योगेश सागर व सुभाष भोयर यांनी प्रश्न उपस्थित केला. यावेळी ह्या हत्या परवानाधारक रिव्हॉल्वरमधून झाल्या असून या परवान्यासाठी आमदार व खासदारांची मदत होत असल्याचे वक्तव्य सुभाष भोयर यांनी केले. त्यावर बंधन आणणे गरजेचे आहे असे भोयर यांनी सांगितले. यावर मुख्यमंत्री फडणवीस यांनी शस्त्र परवान्याची मागणी मोठ्या प्रमाणात होते. त्याची होणारी स्फुटणी करताना नियमांची कडक अंमलबजावणी करण्यासाठी शासन प्रयत्न करेल असे सांगितले.

भविष्यात असे गुन्हांचे प्रमाण कमी व्हावे यासाठी अत्याधुनिक तंत्रज्ञान पद्धती सीसीटीएनएसचा वापर करण्यात येत असल्याचे मुख्यमंत्रानी सांगितले.  देशात सीसीटीएनएस प्रणाली कार्यान्व‍ित करणारे  महाराष्ट एकमेव राज्य आहे, असेही ते म्हणाले.  सीसीटीएनएसद्वारे एफआयआर ची माहिती सर्व्हरवर ऑनलाईन मिळते. सर्व रेकॉर्ड डिजीटलाईज्ड होत असून, लवकरच फिंगर प्रिंट्स मदतीने गुन्हेगारांची सर्व माहिती एकाच वेळी गुन्हे शाखेला ऑनलाईन उपलब्ध होणार असल्याचे मुख्यमंत्र्यांनी विधानसभेत सांगितले.

फिंगर प्रिंटचा डाटा एकत्रित करण्याचे काम सुरू असून, मॅचींग सिस्टम कार्यान्वित करण्यात येणार आहे. एका क्लिकवर गुन्ह्याची सर्व विस्तृत माहिती ऑनलाईन उपलब्ध होणार असल्याचेही मुख्यमंत्री यांनी सांगितले. यावेळी भारती लव्हेकर यांनी रहिवाशी संकुलात सीसीटीव्ही लावण्याची मागणी केली. यावर शासन प्रोत्साहन देत आहे आणि ते आऊट साईट कॅमेऱ्याचे इंटीग्रेशन शासनाच्या सीसीटीव्ही नेटवर्कशी करण्यास शासन तयार आहे असेही मुख्यमंत्र्यांनी सांगितले.