रीचार्ज करण्याच्या नादात 50 हजारांचा गंडा

मुक्ताईनगर : वनविभागात कर्मचारी असलेल्या महिलेच्या मोबाईलवर मेसेज पाठवून दहा रुपयांचा रीजार्ज करा, असे संदेश पाठवून भामट्याने 50 हजारांचा गंडा घातला. या प्रकरणी मुक्ताईनगर पोलिसात अज्ञातांविरोधात गुन्हा दाखल करण्यात आला. तक्रारदार वैशाली अनिल कुलकर्णी (34, पंचायत समिती कार्यालयामागे, मुक्ताईनगर) या ऑनलाईनद्वारे वीज कंपनीचे बिल भरत असताना त्यांनी एका क्रमांकावर संपर्क साधला असता समोरील व्यक्तीने त्यांना एक लिंक पाठवून दहा रुपयांचा रीचार्ज करा, असे सांगण्यात आले. संभाषण सुरू असताना कुलकर्णी यांनी लिंकवर क्लिक करताच तक्रारदाराच्या स्टेट बँक शाखेतून 50 हजार 50 रुपयांची कपात झाली. शुक्रवार, 15 जुलै रोजी सकाळी पावणेदहा वाजता हा प्रकार घडताच मुक्ताईनगर पोलिसात तक्रार दिल्यानंतर शुक्रवारी रात्री गुन्हा दाखल करण्यात आला. तपास प्रभारी निरीक्षक राजेंद्र गुंजाळ करीत आहेत.