रेल्वेच्या धडकेत तरुणीचा मृत्यू

तळेगाव – रेल्वेच्या धडकेत तरुणीचा मृत्यू झाला. ही घटना सोमवारी बेगडेवाडी रेल्वे स्टेशन येथे घडली. दरम्यान, तरुणीची अद्यापपर्यंत ओळख पटू शकली नाही. सोमवारी पहाटे एक वाजताच्या सुमारास धावत्या रेल्वेखाली सापडून एका अनोळखी महिलेचा मृत्यू झाला. या महिलेचे वय अंदाजे पंचवीस वर्षे असून वर्ण गव्हाळ, उंची पाच फूट दोन इंच आहे. तिने अंगामध्ये गुलाबी रंगाचा स्वेटर, निळा टॉप त्यावर फुलपाखरांचे चित्र आणि लाल रंगाची पँट असा वेश परिधान केला आहे. या तरूणीबाबत कोणाला माहिती असल्यास त्यांनी देहूरोड रेल्वे पोलीस चौकीशी संपर्क साधावा, असे आवाहन पोलिसांनी केले आहे.