रेल्वे रुळाला तडे गेल्याने मध्य रेल्वेची वाहतूक विस्कळीत

मुंबई । माटुंगा रेल्वे स्टेशनजवळ रेल्वे ट्रॅकला तडे गेल्याने मध्य रेल्वेची वाहतूक ऐन कामाच्या वेळेत विस्कळीत झाली होती. ऐन गर्दीच्या वेळी वाहतुकीचा खोळंबा झाल्याने प्रवाशांना नाहक त्रास सहन करावा लागला. दरम्यान, सीएसएमटीच्या दिशेने जाणारी वाहतूक पुर्णत: विस्कळीत झाली होती. तसेच कल्याणहून सीएसएमटीच्या दिशेने जाणार्‍या फास्ट ट्रॅकवरील लोकल स्लो ट्रॅकवर वळवण्यात आल्या होत्या. रेल्वेकडून दुरुस्तीचे काम सुरु करून काही काळाने मध्य रेल्वेची वाहतूक पूर्ववत करण्यात आली. मध्य रेल्वेवर वारंवार होणार्‍या या घटनांमुळे प्रवाशांमध्ये मात्र नाराजी आहे.