रोटरीतर्फे शाळेला ई लर्निंग संच भेट

पिंपरी-चिंचवड : जुन्नर तालुक्यातील इंगळूण या दुर्गम व आदिवासी पाड्यावरील आदिमाया माध्यामिक शाळेला रोटरी क्लब ऑफ प्राधिकरण यांनी रोटरी क्लब ऑफ पुना नॉर्थ यांच्या सहाय्याने नुकताच एक ई लर्निंग संच भेट दिला. यावेळी रोटरी अध्यक्ष विलास गावडे, सतीश आचार्य, वैजयंती आचार्य, वसुधा गावडे, महेश ढोले, मुख्याध्यापक मारुती ढोबळे, शिक्षक इनामदार सर व विद्यार्थी उपस्थित होते.शाळेतील मुलांना ई लर्निंग संचाचा वापर कसा करायचा, त्याचा फायदा कसा होतो आदींबाबत माहिती देण्यात आली. आदिमाया माध्यमिक विद्यालय येथे पहिली ते दहावीपर्यंतचे वर्ग आहेत. यामध्ये एकूण 150 मुले शिक्षण घेतात.

विद्यार्थ्यांची स्मरणशक्ती अजब
अध्यक्ष गावडे यांनी मुलांचे व शाळेचे कौतुक केले. ते म्हणाले, रोज येथे मुले पाच किमीची पायपीट करून येतात पण या मुलांना अद्याप मोबाईल, व्हॉट्स अ‍ॅपचे व्यसन नसल्याने येथील मुलांची शिक्षणाची आवड, त्यांची इच्छा व स्मरण शक्ती वाखाणण्या जोगी आहे. जी शहरातील मुलांनाही मागे टाकू शकते, असा विश्‍वासही त्यांनी यावेळी व्यक्त केला.

मुलांच्या चेहर्‍यावर आनंद
यावेळी संचाचे प्रात्यक्षिक करून दाखविले. मुलांना शिकविण्यासाठी नवीन व आधुनिक साधन मिळाले यामुळे शिक्षक व विद्यार्थी यांच्या चेह-यावर समाधान दिसत होते. अशा गरजवंत व दुर्गम भागातील मुलांना शहरातील नागरिकांनीही मदत करावी, असे आवाहन रोटरी क्लब ऑफ प्राधिकरण यांच्यातर्फे करण्यात आले.