लता मंगेशकर यांना आज डिस्चार्ज

मुंबई: भारतरत्न लता मंगेशकर यांना श्वसनाचा त्रास होऊ लागल्याने ब्रीच कँडी रुग्णालयात अतिदक्षता विभागात दाखल करण्यात आले होते. औषधोपचारानंतर त्यांच्या छातीतील जंतूसंसर्ग थोडा नियंत्रणात आल्याची माहिती मंगेशकर कुटुंबीयांतर्फे देण्यात आली. ब्रीच कँडी रुग्णालयातील वरिष्ठ डॉक्टर फारुख उदवाडिया यांच्या देखरेखीखाली उपचार सुरू आहेत. लतादीदींना आयसीयुत दाखल करण्यात आले आहे. त्यांची प्रकृती आता स्थिरअसल्याची माहिती त्यांच्या कुटुंबीयांनी दिली आहे. दरम्यान त्यांना आज घरी जायची परवानगी मिळू शकते अशी माहिती त्यांच्या भगिनी उषा मंगेशकर यांनी दिली .

लता मंगेशकर रुग्णालयात दाखल झाल्याचे कळताच त्यांच्या चाहत्यांमध्ये चिंतेचे वातावरण पसरले आहे. लता मंगेशकर यांच्या भगिनी उषा मंगेशकर यांनी दिलेल्या माहितीनुसार, त्यांना आज, मंगळवारी रुग्णालयातून घरी जाण्याची परवानगी मिळू शकते. त्या वैद्यकीय देखरेखीखाली असून जंतूसंसर्गामुळे त्यांच्यावर रुग्णालयातच उपचार करण्याचा निर्णय घेतल्याचेही त्यांनी सांगितले. त्यांना काही काळ व्हेंटिलेटरवरही ठेवण्यात आले होते. रुग्णालयात उपचार सुरू असतानाच त्यांना घरी सोडल्याची चर्चाही सुरू झाली होती. सोशल मीडियावर या दरम्यान अनेक मेसेज व्हायरल झाले.

रविवारीच लता मंगेशकर यांनी आशुतोष गोवारीकर यांच्या आगामी सिनेमा ‘पानीपत’ मधील गोपिका बाईंची भूमिका निभावणाऱ्या पद्मिनी कोल्हापुरे यांचा फर्स्ट लुक शेअर केला होता. पद्मिनी लतादीदींची भाची आहे. दीदींनी सिनेमाच्या संपूर्ण टीमला शुभेच्छा दिल्या होत्या. अलीकडेच २८ सप्टेंबर रोजी लतादीदींनी आपला ९० वा वाढदिवस साजरा केला.
लता मंगेशकर यांनी हिंदी सिनेमात हजारो गाणी गायली आहेत तर प्रादेशिक भाषांमध्येही त्यांनी विविध गाणी गायली आहेत. त्यांनी सुमारे ३६ प्रादेशिक आणि परदेशी भाषांमध्ये गाणी गायली आहेत. त्यांना भारत रत्न या सर्वोच्च पुरस्काराने सन्मानित करण्यात आले आहे. प्रतिष्ठेच्या दादासाहेब फाळके पुरस्कारासह त्यांचा आतापर्यंत अनेक पुरस्कारांनी सन्मान करण्यात आला आहे.