‘लष्कर‘च्या टॉप कमांडरचा खात्मा

श्रीनगर : काश्मीरच्या अनंतनाग जिल्ह्यात झालेल्या चकमकीत भारतीय जवानांनी लष्कर -ए-तोयबाचा टॉप कमांडर बशीर लश्करीसह दोन दहशतवाद्यांना कंठस्नान घातलेे. गेल्या महिन्यात काश्मीरमधील सहा पोलिसांवर प्राणघातक हल्ला करणार्‍या दहशतवाद्यांमध्ये बशीर लश्करीही होता. त्याचा खात्मा करून भारतीय लष्कराने दहशतवाद्यांना मोठा दणका दिला आहे.

अनंतनागमधील ब्रेन्ती गावात दहशतवादी लपल्याचे कळताच सुरक्षा जवानांनी शोधमोहीम हाती घेतली होती. तेव्हा, एका घरात बशीर लश्करीसह तीन दहशतवादी लपल्याचे स्पष्ट झाले होते. त्यानंतर, जवानांनी त्यांना घेरले आणि त्यांच्यात चकमक उडाली. दहशतवाद्यांनी काही नागरिकांचा ढाल म्हणून वापर केला, तर काही स्थानिक रहिवाशांनी जवानांच्या कामात अडथळे आणले. परंतु, या कशालाही न जुमानता लष्कराने लश्करी आणि त्याच्या साथीदाराचा खेळ खल्लास केला. बुरहान वाणी, सबजार अहमद भट्ट यांच्यापाठोपाठ लश्करीला ठार करून जवानांनी आपली ताकद दाखवून दिली आहे.