लांब पल्ल्याच्या गाड्यांमध्ये प्रथम महिला टीसी

महिला दिनाचे औचित्य साधून पश्‍चिम रेल्वेने महिलांना अनोखी भेट दिली आहे. लांब पल्ल्याच्या ट्रेनमध्ये प्रथमच महिलांना तिकीट तपासणीकांचे काम पहावे लागणार आहे. 8 मार्चपासून मुंबई-सुरत इंटरसिटी एक्स्प्रेसमध्ये प्रायोगिक तत्त्वावर दोन महिला टीसी म्हणून काम पाहणार आहेत.

नीरु वाधवा आणि राधा अय्यर या दोन महिला टीसी मुंबई-सुरत इंटरसिटी एक्स्प्रेसच्या फर्स्ट क्लासमधील प्रवाशांचे तिकीट तपासतील. आतापर्यंत पश्चिम रेल्वेवर उपनगरी लोकल ट्रेन्सच्या महिला कम्पार्टमेंटमध्ये किंवा प्लॅटफॉर्मवरच महिला टीसी होत्या. तीन महिन्यांसाठी प्रायोगिक तत्त्वावर हा उपक्रम राबवण्यात येईल. तो यशस्वी ठरल्यास स्लीपर क्लास आणि जनरल डब्यातही महिला टीसींची नेमणूक करण्यात येईल. यासाठी 20 महिला टीसींची निवड करण्यात आली आहे. दीर्घ अनुभव हा निकष निवडीसाठी ठेवण्यात आला होता. ऑन फील्ड ट्रेनिंगच्या आधी त्यांना मार्गदर्शनही करण्यात आले.

ट्रेनिंग देण्यासाठी 20 महिला टीसींना नोव्हेंबरपासून चार महिने मुंबई-सुरत इंटरसिटीमध्ये पाठवण्यात आलं होतं. तीन बॅचमध्ये या महिलांनी प्रशिक्षण सुरु केलं. त्यावेळी प्रवासात महिला टीसींना कोणत्या समस्या येतील, हे लक्षात आल्यानंतर पश्चिम रेल्वेने त्या दूर केल्याचं अधिकार्‍यांनी सांगितलं.