लाचखोर मोटार वाहन निरीक्षकासह खाजगी पंटर जाळ्यात

बुलढाण्याच्या एसीबी पथकाची नवापूर चेक पोस्टवर कारवाईने खळबळ

नवापूर- नवापूर आरटीओ चेकपोस्टवर पैसे घेवून वाहने सोडण्याची तक्रार बुलढाणा लाचलुचपत प्रतिबंधक विभागाकडे आल्यानंतर पथकाने सापळ रचून मोटार वाहन निरीक्षकासह खाजगी पंटरला अटक केली. या प्रकरणी तिघांविरुद्ध गुन्हा दाखल करण्यात आला आहे. 28 वर्षीय वाहन चालकाने या प्रकरणी तक्रार केली होती. वाहन सोडण्यासाठी नवापूर चेकपोस्टवर प्रत्येकी 300 रुपयांची लाच घेतली जात असल्याची तक्रार आल्यानंतर पडताळणीनंतर सापळा रचण्यात आला. गुरूवारी रात्री मोटार वाहन निरीक्षक शशिकांत विद्याधर जोगे व खाजगी पंटर ईश्वर पांडुरंग शिंदे (40) यांना तक्रारदाराकडून 300 रुपयांची लाच घेताना रंगेहाथ अटक करण्यात आली. ही कारवाई पोलिस अधीक्षक श्रीकांत धीवरे, अपर पोलिस अधीक्षक डोंगरदिवे यांच्या मार्गदर्शनाखाली पोलिस उपअधीक्षक शैलेश जाधव, विलास साखरे, निलेश सोळंखे, विजय मेहेत्रे व चालक मधुकर रगड आदींच्या पथकाने केली.