‘लायन्स’तर्फे पोलिसांना श्रमपरिहार

पुणे । गणेश विसर्जन मिरवणूक निर्विघ्न पार पडावी, यासाठी अहोरात्र बंदोबस्तात असलेल्या पोलिसांना घरचे जेवण देण्यासाठी लायन्स क्लबने घेतलेला पुढाकार कौतुकास्पद आहे. त्यांच्या या भोजनव्यवस्थेमुळे आमच्या पोलिस कर्मचार्‍यांना, सुरक्षारक्षकांना आणि पोलिस मित्रांना बंदोबस्त करताना कुठलीही अडचण भासत नाही, अशी भावना पोलिस आयुक्त रश्मी शुक्ला यांनी व्यक्त केली.

पोलिसांना घरचे जेवण मिळावे, याकरिता लायन्स क्लब ऑफ पुणे सारसबागतर्फे लक्ष्मी रस्त्यावरील रांका ज्वेलर्स येथे श्रमपरिहार केंद्र उभारण्यात आले होते. गेली 12 वर्षे या क्लबतर्फे भोजनव्यवस्था करण्यात येते. महापौर मुक्ता टिळक व पोलिस आयुक्त रश्मी शुक्ला यांच्या हस्ते या श्रमपरिहार केंद्राचे उद्घाटन करण्यात आले. याप्रसंगी पोलिस सहआयुक्त रवींद्र कदम,गिरीश मालपाणी, फत्तेचंद रांका, राज मुछाल, आशा ओसवाल, पोलिस उपनिरीक्षक पवन पाटील, सागर पाटील, चंद्रकांत चमडिया, त्रितेश रांका व कल्पेश पटनी यांच्यासह लायन्स क्लबचे सभासद उपस्थित होते.तीन हजार पेक्षा अधिक पोलिस कर्मचारी, होमगार्ड्स आणि पोलिस मित्रांना पॅकेट्सच्या रूपात जेवण दिले जाते. मंगळवारी सकाळी 11 ते बुधवारी सकाळी 6 वाजेपर्यंत ही भोजनव्यवस्था सुरू होती, असे क्लबचे अध्यक्ष चंद्रकांत चमडिया यांनी सांगितले.