लिटिल फ्लावरमध्ये रंगला पालखी सोहळा

रहाटणी- येथील ‘लिटिल फ्लावर’ नर्सरी स्कुलमध्ये आषाढी एकादशीनिमित्त पालखी सोहळ्याचे आयोजन करण्यात आले होते. यावेळी ज्ञानोबा माऊली…तुकाराम, या जयघोषाने परिसर आनंदी व भक्तिमय झाला होता. वारकर्‍यांचा पेहराव करत विद्यार्थी सोहळ्यात सहभागी झाले होते. गळ्यात तुळशी माळ, कपाळी बुक्का, गळ्यात टाळ, मृदुंग तर मुलींच्या डोक्यावर तुळशी वृंदावन व मुखातून ज्ञानोबा-तुकारामांच्या नावाचा जयघोष यामुळे शाळेचा सर्व परिसर भक्तिमय झाला होता. तर वारकरी व विठ्ठल रुक्मिणीचा वेष परिधान केलेले चिमुकले लक्ष वेधून घेत होते. मुख्याध्यापिका अनिता जांभळे यांच्या हस्ते ज्ञानोबा माऊली व तुकाराम महाराजांच्या प्रतिमेचे पूजन करण्यात आले. यावेळी नीता सोनवणे, शिल्पा पंडित, वैशाली चौधरी, सुरेखा गायकवाड, शीला झोडगे व उज्वला ढवळे आदी शिक्षक व शिक्षकेतर कर्मचारी उपस्थित होते.