लोकराज्यमुळे ज्ञानात भर

ठाणे । महाराष्ट्र वार्षिकी, महामानव अशा सारख्या प्रकाशनांमुळे लोकांच्या ज्ञानात भर पाडण्याचे आणि त्यांना वस्तुनिष्ठ माहिती देण्याचे चांगले काम माहिती व जनसंपर्क महासंचालनालय करीत आहे अशा शब्दांत पालकमंत्री एकनाथ शिंदे यांनी कौतुक केले. राज्य शासनाच्या विविध निर्णयांवर आधारित लोकराज्यच्या विशेषांकाचे प्रकाशनही त्यांनी व खासदार डॉ श्रीकांत शिंदे यांनी आज ठाण्यात केले. लोकराज्यच्या अंकामुळे राज्य शासनाने जिल्हा आणि विभागनिहाय घेतलेल्या निर्णयांचे उत्तम संकलन झाले असून शासनाने विविध क्षेत्रांत कशा स्वरूपाचे काम केले आहे ते वाचकांपर्यंत अधिक परिणामकारकरित्या पोहचवू शकतो असे पालकमंत्री म्हणाले.

प्रकाशनांविषयी दिली माहिती
सांसद आदर्श गाव योजनेत लोकराज्यच्या माध्यमातून आपण केंद्र व राज्याच्या चांगल्या योजना तेथील गावकर्‍यांपर्यंत पोहचवूत असे खासदार डॉ शिंदे म्हणाले. महाराष्ट्र वार्षिकीसारख्या राज्याविषयी अधिकृत माहिती देणार्‍या पुस्तकाची आवश्यकता होती. याचा फायदा विशेषत: विद्यार्थी, शिक्षक तसेच पत्रकार व माध्यमांनाही संदर्भ म्हणून होणार आहे असे ते म्हणाले. विभागीय उपसंचालक डॉ गणेश मुळे व जिल्हा माहिती अधिकारी अनिरुध्द अष्टपुत्रे यांनी या प्रकाशनांविषयी माहिती दिली. हे पुस्तक सशुल्क जिल्हा माहिती कार्यालयातून मिळू शकते.