लोकसहभागातून नद्यांचे पुनरुज्जीवन

चाळीसगाव। तितूर व डोंगरी नदीच्या माथ्यापासून ते 40 कि.मी. पर्यंत पसरलेल्या पायथ्या पर्यंतच्या जमिनींचा शाश्वत विकास होण्यासाठी बारमाही पाणी मिळावे या उद्देशाने नदीचे रुंदीकरण व विस्तारीकरण करून पुनरुज्जीवन करण्याचा संकल्प आज आमदार उन्मेशदादा पाटील यांनी शिंदी येथे झालेल्या कार्यक्रमात केला. स्वातंत्र्यानंतर पहिल्यांदाच या नद्यांच्या उगमस्थानापासून नदीच्या प्रवाहाच्या दोन्ही बाजूस लोकसहभागातून तितूर व डोंगरी नदीच्या पात्राचे रुंदीकरण व विस्तारीकरण करण्यासाठी 7 जून रोजी शिंदी तालुक्यातील सर्व प्रशासकीय अधिकार्‍यांच्या उपस्थितीत या अनोख्या उपक्रमाची शिंदी येथे सुरुवात करण्यात आली.

असे होणार नदीचे पुनरुज्जीवन
सदर नदी पुनरुज्जीवन कामाचे 2 टप्प्यात रुंदीकरण व विस्तारीकरण केले जाणार आहे. यात जुनपानी, खराडी, चतुर्भुज तांडा, शिंदी, गणेशपूर, चितेगाव, तांबोळे, खडकी, पाटखडकी, चाळीसगाव शहर, ओझर, पातोंडा, बोरखेडा, वाघळी व हिंगोणे गावांपर्यंत या नदीपात्राचे रुंदीकरण व विस्तारीकरण करून निघालेली माती दोन्ही बाजूला लावून पात्राची उंची वाढणार आहे. यापैकी जुनपानी ते चाळीसगाव या प्रथम टप्यात 7 कोटींचा आराखडा तयार असून 3 कोटींची कामे प्रगतीपथावर आहेत.

पाणी साठवण्यासाठी केले नियोजन
जुनपानीच्या डोंगरात या नद्यांचा उगम असून त्यापासून ते थेट हिंगोणे सीम पर्यंत नदीची दुरावस्था झाली आहे. अनेक ठिकाणी नदीची नाल्यासारखी अवस्था झाली असून या नदीवर मुसळधार पावसाच्या वेळी पाणी वाहून वाया जाते. नदीच्या अरुंद पात्रामुळे नदीचे अस्तित्व धोक्यात आले आहे. त्यामुळे तालुक्यातील 40 कि.मी.लांब वाहणारी नदीचे रुंदीकरण व विस्तारीकरण करून नदी परिसरात जमिनींना या पाण्याचा बारमाही लाभ व्हावा व परिसरातील शेतकरी बांधवांचा शाश्वत विकास व्हावा यासाठी या नदीला पुनर्वैभव प्राप्त करून देण्याचा संकल्प केला असल्याचे प्रतिपादन आमदार उन्मेशदादा पाटील यांनी केले. शिंदीचे सरपंच गोरख राठोड यांनी कार्यक्रमाच्या प्रास्ताविकात, या कामामुळे आमच्या परिसराचा कायापालट होणार असल्याची भावना व्यक्त केली. तर यावेळी के बी दादा साळुंखे, व्ही व्ही पोतदार, राजेश ठोंबरे, आनंद आसोलकर, संजय पाटील, प्रांताधिकारी शरद पवार, तहसिलदार कैलास देवरेयांनी उपस्थित ग्रामस्थांना मार्गदर्शन केले.

यांची होती उपस्थिती
औरंगाबाद येथील नाम फौन्डेशनचे जलतज्ञ आनंद आसोलकर, प्रांताधिकारी शरद पवार, तहसिलदार कैलास देवरे, सभापती स्मितल बोरसे, उपसभापती संजय पाटील, भाजपा तालुकाध्यक्ष के.बी.साळुंखे, गटविकास अधिकारी मधुकर वाघ, सर्पतज्ञ राजेश ठोंबरे, तालुका कृषी अधिकारी आर.एस.राजपूत, लघुसिंचन उपअभियंता विष्णू पोतदार, जलसंपदाचे सहाय्यक कार्यकारी अभियंता सचिन पाटील, उपअभियंता राहुल पाटील, स्थापत्य अभियंता धनंजय गायकवाड, पं.स.सदस्य कैलास पाटील, भाऊसाहेब पाटील, सुभाष पाटील, लताबाई दौंड, संजय मोरे, उद्यान पंडित बाळासाहेब राउत, माजी प.स.सदस्य दिनेश बोरसे, मच्छीद्र राठोड, विश्वास चव्हाण, शिंदी उपसरपंच अंजनाबाई राठोड, करगावचे दिनकर राठोड आदी उपस्थित होते.