लोहगाव विमानतळावर अ‍ॅलर्ट
पुणे : भारतीय हवाई दलाने पाकिस्तानामध्ये घुसून केलेल्या कारवाईनंतर देशातील सर्व हवाई तळ आणि लष्करांच्या सदर्न कमांडला सज्ज राहण्याचे आदेश देण्यात आले आहेत. पुण्यात लष्कराचे देशातील सर्वांत मोठे मुख्यालय व हवाई दलाचा तळ आहे. येथील यंत्रणा मंगळवारी सज्ज करण्यात आली आहे. लष्कराची यंत्रणा, साधनसामग्री लोहगाव येथील हवाई तळावर हलविण्यासाठी शहर पोलिसांची मदत घेण्यात आली होती.
सर्व विभाग सज्ज ठेवण्याच्या हालचाली
पुणे शहरात लष्कराचे सर्वांत मोठे मुख्यालय आहे. तसेच दारूगोळा कारखाने, आयुध निर्माण संस्था, संशोधन संस्था, प्रशिक्षण संस्था, हवाई दलाचा तळ, अशा महत्त्वाच्या संस्था आहेत. कारवाईनंतर लष्कराला हाय अ‍ॅलर्ट देण्यात आला आहे. त्यामुळे लष्कराचे सर्व विभाग सज्ज ठेवण्याच्या हालचाली सुरू झाल्या आहेत. सीमावर्ती भागात कोणतीही मदत लागल्यास ती तातडीने पुरविता यावी, यासाठी सदर्न कमांड व हवाई दलाची साधनसामग्री लोहगाव येथील हवाई दलाच्या तळावर हलविण्यात आली. ही साधनसामग्री व्यवस्थितपणे हलविता यावी, यासाठी शहर पोलीस दलाची मदत घेण्यात आली.ही सामग्री घेऊन जाणार्‍या लष्करी वाहनांच्या ताफ्याला शहरातील वाहतुकीचा अडसर होऊ नये, यासाठी रस्त्यावर चॅनेल करून देण्यात आला होता.
पोलीसांचा बंदोबस्त वाढविला
वरिष्ठ पोलीस अधिकार्‍यांनी सांगितले की, शहरातील महत्त्वाच्या लष्करी केंद्राच्या परिसरात गस्त वाढविण्यात आली आहे. लष्कराच्या मागणीनुसार पोलिसांची मदत त्यांना पुरवण्यात आली. लष्कराची यंत्रसामग्री सुरक्षितपणे हलवण्यासाठी पोलिसांची मदत घेण्यात आली. नेहमीच्या तुलनेत पोलिसांचा बंदोबस्त वाढण्यात आला आहे. जेव्हा जेव्हा हवाई दल तसेच लष्कराला आवश्यक ती मदत लागेल, त्यानुसार शहर पोलीस दलाकडून ती पुरविण्यात येणार आहे.