वजन वाढले! मुख्यमंत्र्यांच्या हेलिकॉप्टरचे इमर्जन्सी लॅण्डिंग!

नाशिक : मुख्यमंत्री देवेंद्र फडणवीस यांच्या हेलिकॉप्टरचे शनिवारी सकाळी नाशिकमध्ये इमर्जन्सी लॅण्डिंग करण्यात आले. हेलिकॉप्टरमध्ये क्षमतेपेक्षा जास्त सामान व प्रवासी असल्याने वजन वाढले होते. त्यामुळे हेलिकॉप्टर पुन्हा जमिनीवर आणावे लागले. नाशिकमधून उड्डाण करताना या हेलिकॉप्टरने दोनदा हवेत झेप घेतली. मात्र, त्यावेळी हेलिकॉप्टरमध्ये क्षमतेपेक्षा अधिक वजन असल्याची बाब वैमानिकाच्या लक्षात आल्यानंतर हेलिकॉप्टर खाली उतरविण्यात आले. त्यानंतर मुख्यमंत्र्यांच्या एका सचिवाला हेलिकॉप्टरमधून खाली उतरविण्यात आले. भार कमी झाल्यानंतर मुख्यमंत्री औरंगाबादच्या दिशेने रवाना झाले.

क्षमतेपेक्षा जास्त प्रवासी बसले
शनिवारी सकाळी दहाच्या सुमारास मुख्यमंत्री नाशिकहून औरंगाबादला निघाले असताना ही घटना घडली. मुख्यमंत्र्यांच्या हेलिकॉप्टरने उड्डाण केल्यानंतर काही वेळातच पायलटने इमर्जन्सी लॅण्डिंग केले. यावेळी हेलिकॉप्टरमध्ये मुख्यमंत्र्यांसोबत जलसंपदामंत्री गिरीश महाजन आणि इतर काही सचिवही होते. मागील तीन-चार दिवसांपासून मुख्यमंत्री सतत दौर्‍यावर असल्यामुळे त्यांच्या हेलिकॉप्टरमध्ये बरेच सामान असल्याचे समजते. त्यामुळे आधीच सामानचे वजन त्यात अनेकजण हेलिकॉप्टरमध्ये बसल्याने वजन वाढले. उड्डाण केल्यानंतर पायलटला पुढील धोका लक्षात आल्याने हेलिकॉप्टर तात्काळ हेलिपॅडवर उतरवण्यात आले. हेलिकॉप्टरमधून एका सचिवाला खाली उतरल्यानंतरच हेलिकॉप्टर औरंगाबादच्या दिशेने रवाना झाले.

आठ महिन्यातील तिसरी घटना
मुख्यमंत्र्याच्या हेलिकॉप्टरचे इमर्जन्सी लॅण्डिंग ही गेल्या आठ महिन्यांच्या काळातील तिसरी घटना आहे. मे आणि जुलैमध्ये मुख्यमंत्र्यांच्या हेलिकॉप्टरला दोन वेळा अपघात झाला होता. 25 मेरोजी लातूर दौर्‍यावर असताना निलंगा येथून उड्डाण घेत असताना मुख्यमंत्र्यांच्या हेलिकॉप्टरच्या पात्यांचा विजेच्या तारांना स्पर्श होऊन ते कोसळले. यावेळी मुख्यमंत्र्यांसह सरकारी अधिकारी थोडक्यात बचावले होते. या अपघाताच्या काही दिवसांनतरच म्हणजे 7 जुलैरोजी अलिबाग येथील आमदार जयंत पाटील यांचा वाढदिवस आणि पीएनपी नाट्यगृहाच्या उद्घाटन सोहळ्यानंतर मुख्यमंत्री मुंबईला परत जात असताना दुसरी घटना घडली होती. मुख्यमंत्री बसण्यापूर्वीच हेलिकॉप्टरने टेक ऑफ घेण्यास सुरुवात केली होती. यातूनही मुख्यमंत्री थोडक्यात बचावले होते.