वढुमध्ये समाधीची नासधूस; दोषींवर करणार कडक कारवाई
शिक्रापूर । वढू येथील गोपाळ गोवींद्र महार यांच्या समाधीवरील छत व त्याकडे जाणार्या बोर्डाची नासधूस करुन शिवीगाळ केल्याप्रकरणी 49 जणांवर अॅट्रॉसिटी गुन्हा दाखल करण्यात आला. जिल्हा पोलिस अधिक्षक सुवेझ हक यांनी स्वत: गावात येवून या प्रकरणी हस्तक्षेप केल्याने दोन समाजात होवू घातलेला संभाव्य संघर्ष टळला. दोषींवर कडक कारवाई करण्यात येईल, असे आश्वासन जिल्हा पोलिस अधीक्षक सुवेझ हक यांनी दिले आहे.
वढु बुद्रुक (ता. शिरूर) येथे 1 तारखेच्या पेरणे येथील विजयस्तंभाच्या कार्यक्रमाच्या पार्श्वभूमीवर एक सामाजिक शांततेची बैठक शिक्रापूर पोलिसांनी बोलाविली होती. या बैठकीपूर्वी सकाळी सव्वा दहाच्या सुमारास गावातील काही युवकांनी गोपाळ गोवींद महार यांच्या समाधीस्थळाकडे जाणारा फलक काढून टाकत समाधीवर असलेल्या छताची नासधूस केली. घडलेल्या घटनेच्या पाश्वभूमीवर शिक्रापूर पोलिसांचे एक पथक घटनास्थळी दाखल झाले.
पोलिस अधीक्षक सुवेझ हक यांनी सांगितले की, वढुची घटना निंदनीय असून, अशा घटनांमध्ये दोषी असणार्यांवर कडक कारवाई करण्यासाठी जिल्हा पोलिस सक्षम आहेत. याबाबत येत्या चार तारखेला पुन्हा बैठक घेवून या प्रकरणाचा आढावा घेवून पुढील कार्यवाही केली जाईल. बैठकीसाठी अतिरिक्त पोलिस अधिक्षक डॉ. संदीप पखाले, उपविभागिय पोलिस अधिकारी गणेश मोरे, प्रांताधिकारी भाऊसाहेब गलांडे, तहसिलदार रणजित भोसले, पोलिस निरिक्षक रमेश गलांडे, राजेंद्र कुंटे, अमर वाघमोडे आदी उपस्थित होते.
शिक्रापूर पोलिस ठाण्यात तक्रार दाखल
यावेळी या बैठकीला रिपब्लिकन पार्टी, रिपब्लिकन सेना, दलीत कोब्रा, रिपब्लिकन युवा मोर्चा आदी संघटनांचे प्रशांत पगारे, अशोक शेलवंत, सर्जेराव वाघमारे, निलेश आल्हाट, भाऊसाहेब भालेराव, किरण आल्हाट, राजेंद्र गायकवाड, विवेक बनसोडे, युवराज बनसोडे, अजय शिंदे, संजय देखणे आदी पदाधिकारी तसेच स्थानिक पांडूरंग गायकवाड, संदीप गायकवाड आदी उपस्थित होते. या घटनेनंतर सुषमा सुभाष ओव्हाळ यांनी शिक्रापूर पोलिस स्टेशन येथे तक्रार दाखल केली. एकूण 49 जणांवर ऍट्रॉसिटी कायद्यांतर्गत गुन्हा दाखल करण्यात आले असल्याची माहिती शिक्रापूर पोलिसांनी दिली.
परिस्थिती नियंत्रणात
याबाबतची माहिती मिळताच जिल्हा पोलिस अधिक्षक सुवेझ हक हे दुपारी तीनच्या सुमारास गावात दाखल झाले. याच दरम्यान दंगल नियंत्रण पथकासह जिल्हा पोलिस अधिक्षक कार्यालय, शिरुर व रांजणगाव पोलिस स्टेशनचे पोलिस पथकही दाखल झाले. यावेळी हक यांनी दोन्ही गटांशी स्वतंत्र चर्चा केली. यावेळी मागासवर्गीय संघटनेच्या प्रतिनिधींशी स्वतंत्र बैठक घेवून या प्रकरणी दोषींवर अॅट्रॉसिटी कायद्यांतर्गत गुन्हे दाखल करण्याची ग्वाही दिली व या प्रकरणाची पुढील बैठक 4 जानेवारी रोजी घेण्याचे निश्चित करण्यात आले.