वर्ल्ड कपच्या इतिहासातील सर्वात थरारक सामना; इंग्लंड बनला विश्वविजेता !

लॉर्डस: आजपर्यंत वर्ल्ड कपच्या इतिहासात कधीही झाला नसेल असा सामना काल झालेल्या वर्ल्ड कपच्या अंतिम सामन्यात झाला. इंग्लंडला विजयासाठी केवळ २४२ धावांची गरज होती, मात्र किवीच्या गोलंदाजांनी शेवटच्या चेंडू पर्यंत हा सामना ताणून नेत, सुपर ओव्हरचा खेळ खेळण्याची परिस्थिती निर्माण केली. अखेर सुपर ओव्हरपर्यंत रंगलेल्या चुरशीच्या लढतीत यजमान इंग्लंडने न्यूझीलंडवर विजय प्राप्त करत विश्वचषक स्पर्धेच्या जेतेपदावर नाव कोरले. सामना टाय झाल्यानंतर सुपर ओव्हर देखील टाय झाली. अशा या थरारक लढतीत सर्वाधिक चौकाराच्या बळावर इंग्लंडला विजयी घोषित करण्यात आले. इंग्लंडचा विजयाचा शिल्पकार ठरला तो बेन स्टोक्स. त्याने प्रतिकूल परिस्थितीत इंग्लंडला सावरत विजयाकडे नेले.

क्रिकेटच्या इतिहासात पहिल्यांदाच इंग्लंडला विश्वविजयाचा मान मिळाला आहे. तर न्यूझीलंडला वर्ल्डकप स्पर्धेत सलग दुसऱ्यांदा उपविजेतेपदावर समाधान मानावे लागले आहे. इंग्लंडचा बेन स्टोक्स आणि गोलंदाज जोफ्रा आर्चर इंग्लंडच्या विजयाचे शिल्पकार ठरले. बेन स्टोक्सने नाबाद ८४ धावा केल्या. तर सुपर ओव्हरमध्येही स्टोक्सने दमदार फलंदाजी केली. जोफ्रा आर्चरने सुपर ओव्हरमध्ये केलेल्या अप्रतिम गोलंदाजीच्या जोरावर इंग्लंडला विजय साजरा करता आला. बेन स्टोक्सला सामनावीराच्या पुरस्काराने गौरविण्यात आले.

न्यूझीलंडने इंग्लंडसमोर विजयासाठी २४२ धावांचं आव्हान दिलं होतं. प्रत्युत्तरात न्यूझीलंडच्या गोलंदाजांनी अफलातून कामगिरी करत इंग्लंडचा डाव २४१ धावांवर संपुष्टात आणला होता. सामना टाय झाल्याने वर्ल्डकप फायनलमध्ये पहिल्यांदाच सुपर ओव्हर खेळविण्यात आली. इंग्लंडने सुपर ओव्हरमध्ये १५ धावा केल्या. विशेष म्हणजे प्रत्युत्तरात न्यूझीलंडनेही सुपर ओव्हरमध्ये १५ धावा केल्या. त्यामुळे आयसीसीच्या नियमांनुसार अखेर इंग्लंडला सर्वाधिक चौकार ठोकल्याच्या मुद्द्यावर विजयी घोषित करण्यात आले.