वर्ल्ड सिटीज कल्चरल फोरममध्ये मुंबईला सदस्यत्व

मुंबई । जागतिक सांस्कृतिक मंचमध्ये (वर्ल्ड सिटीज कल्चरल फोरम) मुंबई शहराचा समावेश सदस्य शहर म्हणून करण्यासंदर्भातील कागदपत्रांवर लंडनचे महापौर सादिक खान व मुंबईचे महापौर विश्‍वनाथ महाडेश्‍वर यांनी स्वाक्षर्‍या केल्या. यावेळी सार्वजनिक वाहतूक व्यवस्था, वैद्यकीय पर्यटन यांच्यासह इतर विविध क्षेत्रांत मुंबई आणि लंडनमध्ये वाढत्या सहकार्याबद्दल चर्चा झाली. यावेळी ब्रिटीश उपउच्चायुक्त स्क्रिस्पिन सिमॉन, मुंबईचे महापौर विश्‍वनाथ महाडेश्‍वर, मुख्यमंत्र्यांचे अपर मुख्य सचिव प्रवीण परदेशी, उद्योग विभागाचे अपर मुख्य सचिव सुनील पोरवाल, नगर विकास विभागाचे प्रधान सचिव नितीन करीर, राजशिष्टाचार अधिकारी राजगोपाल देवरा, मुंबई महानगरपालिकेचे आयुक्त अजोय मेहता आदी यावेळी उपस्थित होते.

लंडनच्या सहकार्याने मुंबईमध्ये आरोग्य, पर्यटन, चित्रपट, वाहतूक या विविध क्षेत्रातील एकमेकांच्या सहकार्यामुळे दोन्ही शहरांमधील मैत्रीचे नाते अधिक दृढ होईल. तसेच दोन्ही शहरांच्या संबंधामध्ये नवीन अध्याय सुरू होईल, असे प्रतिपादन मुख्यमंत्री देवेंद्र फडणवीस यांनी यावेळी केले. मुंबई ही सध्या भारताची आर्थिक राजधानी आहे. मात्र, मुंबईला आर्थिक व तंत्रज्ञानाचे जागतिक केंद्र म्हणून जगाच्या नकाशावर आणण्याचे आमचे ध्येय असून त्यासाठी प्रयत्न सुरू आहेत, असे मुख्यमंत्र्यांनी सागितले. यावेळी सादिक खान म्हणाले, मुंबई व लंडन ही जुळी शहरे आहेत. लंडनप्रमाणेच मुंबई सुद्धा आर्थिक, व्यापारी केंद्र आहे. लंडनमध्ये अनेक भारतीय नागरिक राहतात. तर लंडनचे उपमहापौर हे भारतीय वंशाचे आहेत. त्यामुळे एकमेकांचे बांधव आहोत.