वसई-नालासोपार्‍यादरम्यान रेल्वे रुळावर रॉड
वसई : वसई-नालासोपारादरम्यान रेल्वे रुळावर रॉड सापडल्याची धक्कादायक बाब समोर आली आहे. मात्र मोटरमननं दाखवलेल्या प्रसंगावधानानं मोठी दुर्घटना टळली आहे. शनिवारी रात्री 8 वाजून 35 मिनिटांनी ही घटना अचोले इथे घडली. वसईहून चर्चगेटच्या दिशेने जाणारी गाडी नालासोपारा स्थानकाजवळ येताच मोटरमन नितीन चंदनशिवे यांना रूळावर रॉड पडलेला दिसला. त्यांनी तात्काळ गाडी थांबवत गार्डसह खाली उतरून रॉड रूळांवरून हटवला.
आरपीएफकडून या प्रकरणाची पुढील चौकशी सुरू
लोकल कमी वेगात असल्यामुळे मोटरमनला गाडी वेळेत थांबवणे शक्य झाले. अन्यथा गाडी रूळावरून घसरण्याची दाट शक्यता होती. सध्या आरपीएफकडून या प्रकरणाची पुढील चौकशी सुरू आहे. काही महिन्यांपूर्वी मध्य आणि पश्चिम रेल्वेमार्गावर काही ठिकाणी अशाचप्रकारे रूळावर रॉड ठेवून रेल्वेला घातपात करण्याचे प्रयत्न झाले होते. मात्र, या घटनेमागे कोणत्याही घातपाताची शक्यता नसल्याचे रेल्वे अधिकार्‍यांनी स्पष्ट केले आहे.
तो फक्त लोखंडी रॉड होता
कोणीही घाबरण्याची गरज नाही कारण तो रॉड रेल्वे रूळाचा भाग नसून फक्त लोखंडी रॉड होता. येथून जवळच एका पुलाचे काम सुरू असल्याने हा रॉड रूळावर पडल्याची शक्यता आहे. मात्र, हा प्रकार नेमका कसा घडला, याचा तपास सुरू असल्याची माहिती रेल्वे अधिकार्‍यांनी दिली. याआधीही दिव्यात आणि पनवेलजवळ रेल्वे ट्रॅकवर लोखंडी रॉड आढळला होता. त्यामुळे शनिवारी सापडलेल्या रॉडमागे कुठला घातपात होता का याचाही तपास सुरु आहे.