वाकडमधील झोपड्या आगीत जाळून खाक

पुणे – गॅस सिलेंडर लीक झाल्याने बांधकाम कामगारांच्या झोपडीला आज सकाळी १० च्या सुमारास आग लागली. वाकडमधील कस्पटेवस्ती येथे ही घटना घडली. यामध्ये कोणतीही जीवितहानी झाली नाही. मात्र, कामगारांच्या ५ झोपड्या जळून खाक झाल्या. प्रत्यक्षदर्शींनी दिलेल्या माहितीनुसार, कस्पटे वस्तीमधील दत्त मंदिराजवळ बांधकाम कामगारांच्या झोपड्या आहेत. आज सकाळी सर्व कामगार कामावर गेले असता एका झोपडीतील गॅस सिलेंडर लीक झाल्याने परिसरातील ५ झोपड्यांना आग लागली.

अग्निशमन विभागाला घटनेची माहिती मिळताच संत तुकाराम नगर आणि रहाटणी अग्निशमन केंद्राचे दोन बंब घटनास्थळी तात्काळ दाखल झाले. अग्निशमन दलाच्या जवानांनी काही वेळात आगीवर नियंत्रण मिळविले. सर्व कामगार कामासाठी घराबाहेर पडल्याने कोणतीही जीवितहानी झाली नाही. मात्र, आगीमध्ये ५ झोपड्या पूर्णपणे जळून खाक झाल्या. ही आग सिलिंडरचा स्फोट झाल्याने लागली नसून लीक झालेल्या गॅसने पेट घेतल्यामुळे लागली असल्याची शक्यता अग्निशमन विभागाने वर्तविली आहे.