वाघाला दगड मारल्याने पर्यटकाला 51 हजारांचा दंड
जयपूर:एका झोपलेल्या वाघाला दगड मारल्याच्या कारणावरून गाइडसह एका पर्यटकाला 51 हजार रुपयांचा दंड ठोठावण्यात आला. ही घटना राजस्थानमधील रणथंभोर राष्ट्रीय उद्यानात मंगळवारी घडली. उद्यानातील पीलीघाट गेटवर वाघ झोपला असल्याचे पर्यटक आणि त्याच्या गाइडने पाहिले. त्यावेळी हा पर्यटक जिप्सीमध्ये बसला होता. त्यानंतर जिप्सीमधून खाली उतरत वाघाला जागे करण्यासाठी गाइडने त्याला दगड मारला.
हा प्रकार तेथील थर्मल इमेज कॅमेर्‍यात कैद झाला. हा कॅमेरा वाघांच्या हालचालींवर नजर ठेवण्यासाठी लावण्यात आला आहे. पर्यटक आणि गाइडने राष्ट्रीय उद्यानातील नियमांचे उल्लंघन केल्याचे लक्षात आल्यानंतर त्यांना तातडीने उद्यान सोडण्याचे आदेश देण्यात आले. शिवाय, त्यांना 51 हजार रुपयांचा दंड ठोठावण्यात आला.