वायनाडमध्ये राहुल गांधींविरोधात तीन गांधी ; डोकेदुखी वाढली !

वायनाड: कॉंग्रेस अध्यक्ष राहुल गांधी उत्तर प्रदेशातील अमेठीसह केरळमधील वायनाड अशा तों मतदारसंघातून लोकसभा निवडणूक लढत आहे. अमेठीमध्ये त्यांच्या समोर विजयाचे आव्हान होते त्यामुळे त्यांनी वायनाडमधून निवडणूक लढविण्याचा निर्णय घेतला होता. त्यांच्यासमोरील आव्हान आणखी कठीण झाले आहेत. भाजप आणि डाव्यांच्या कडव्या विरोधाचा सामना करणाऱ्या राहुल यांच्याविरोधात वायनाडमधून तीन गांधींनी उमेदवारी अर्ज दाखल केले आहेत. विशेष म्हणजे यात राहुल गांधी नावाच्या उमेदवाराचाही समावेश आहे.

भाजपने मित्रपक्षाच्या दिग्गज उमेदवाराला मैदानात उतरवले आहे. त्यामुळे येथील लढत चुरशीची झाली आहे, असे असतानाच वायनाडमधून गांधी आडनावाच्या तीन उमेदवारांनी अर्ज दाखल केले आहेत. के.ई.राहुल गांधी, के.राघुल गांधी आणि के.एम.शिवप्रसाद गांधी अशी या उमेदवारांची नावे आहेत. ३३ वर्षीय के.ई.राहुल गांधी हे कोट्टायमचे रहिवासी असून अगिला इंडिया मक्कल कझगम पक्षाचे सदस्य आहेत. ते एमफिल असून त्यांच्या खात्यात केवळ ५१५ रुपये आहेत.

के.राघुल गांधी हे पत्रकार असून त्यांची पत्नी दंतचिकित्सक आहे. शिवप्रसाद गांधी हे संस्कृत विषयाचे शिक्षक असून त्यांची पत्नी कम्प्युटर ऑपरेटर आहे. हे दोघेही अपक्ष म्हणून निवडणूक रिंगणात उतरले आहेत. या नामसाधर्म्याचा फटका राहुल गांधी यांना कितपत बसतो ते पाहणं महत्त्वाचे ठरणार आहे. केरळमधील सर्व २० लोकसभा मतदारसंघात येत्या २३ एप्रिलला मतदान होणार आहे. अर्ज मागे घेण्याची तारीख ८ एप्रिल आहे.