वाळूची अवैध वाहतुक करणारे तीन ट्रॅक्टर पकडले

खेडी परिसरातुन वाहतुक करतांना महसूलच्या पथकाची कारवाई

जळगाव – जिल्ह्यात वाळु वाहतुकीला बंदी असतांना अवैधपणे वाळु वाहतुक करणारे तीन ट्रॅक्टर आज महसूल विभागाच्या पथकाने पकडले. या कारवाईमुळे अवैध वाळु वाहतुक करणार्‍यांमध्ये मोठी खळबळ उडाली आहे.
जिल्ह्यात वाळु उपशाला बंदी आहे. तसेच वाळु घाटांची लिलाव प्रक्रिया देखिल झालेली नाही. त्यामुळे जिल्ह्यातील गिरणा, तापी नदीपात्रातुन मोठ्या प्रमाणावर वाळूचा अवैधरित्या उपसा केला जात आहे. थेट नदीमध्ये ट्रॅक्टर आणि डंपर उतरवून वाळुची चोरटी वाहतुक केली जात आहे. या अवैध वाळु वाहतुकीवर नियंत्रण आणण्यासाठी महसुल विभागाने पथके कार्यान्वीत केली आहेत. आज सकाळपासूनच महसुल विभागाचे पथक गस्त घालत होते. या गस्ती दरम्यान मोहाडी रोड परिसरातुन अवैध वाळु वाहतुक करणारे मोहाडी येथील राकेश कोळी यांचे ट्रॅक्टर क्र. एमएच १९ सीबी ३५३८ हे पथकाने पकडले. तसेच ममुराबाद रस्त्यावर देखिल दोन ट्रॅक्टर वाळुची अवैध वाहतुक करतांना पकडले. दोन ट्रॅक्टर जिल्हा पेठ पोलीस ठाण्यात जमा करण्यात आले आहे. खेडी परिसरातुन ही अवैध वाळू वाहतुक केली जात आहे. प्रांताधिकारी दीपमाला चौरे व तहसीलदार वैशाली हिंगे यांच्या मार्गदर्शनाखाली मंडळ अधिकारी रविंद्र उगले, जगदीश गुरव, योगेश नन्नवरे, परवेझ शेख, दिनेश उगले, पोकॉ हितेश महाजन यांच्या पथकाने ही कारवाई केली.

कारवाई सुरूच राहणार – तहसीलदार हिंगे
अवैध वाळु वाहतुकीच्या अनेक तक्रारी येत असल्याने पथकांना गस्त घालण्याचे आदेश दिले आहे. अवैध वाळु वाहतुकीवर नियंत्रण आणण्यासाठी पथकाकडुन नियमीतपणे कारवाई केली जात आहे. जप्त केलेल्या वाहनधारकांवर दंडात्मक कारवाई देखिल केली जात आहे. लिलाव होत नाही तोपर्यंत ही कारवाई सुरूच राहणार आहे.
वैशाली हिंगे, तहसीलदार जळगाव.