वावडीत वनविभागाच्या पथकाची धाड
12 लाखाच्या सागाच्या मुद्देमालासह दोन जण ताब्यात
नवापूर । तालुक्यातील वावडी गावात दोन घरांच्या झडतीत सुमारे बारा लाखाचे खैर, शिसम व साग प्रजातीचे अवैध तोडीचे साठवून ठेवलेले लाकूड वनविभागाच्या पथकाने शुक्रवारी, 7 रोजी सहाय्यक वनसंरक्षक गणेश रणदिवे यांच्या मार्गदर्शनाखाली शिताफीने छापा टाकून जप्त केले. गोळा केलेल्या मालाची अंदाजित किंमत सुमारे 12 लाखाची असल्याचा अंदाज करण्यात आला आहे. याप्रकरणी दोन जणांना ताब्यात घेण्यात आले आहेत.
वन विभागाचे सहाय्यक वनसंरक्षक गणेश रणदिवे यांच्या मार्गदर्शनाखाली नवापूरचे वनक्षेत्रपाल प्रथमेश हाडपे, चिंचपाडाचे वनक्षेत्रपाल आर.बी.पवार यांनी नंदुरबार, नवापूर व चिंचपाडा वनविभागातील कर्मचार्‍यांनी मिळालेल्या गोपनिय माहितीवरुन नवापूर तालुक्यातील वावडी गावात दोन घरांची धाड टाकून झडती घेतली. त्यात ताज्या तोडीचे अवैधपणे साठवून ठेवलेले खैर, शिसम व साग प्रजातीचे लाकूड सुमारे साठा जप्त केला. लाकुडचा एवढा मोठा साठा प्रथमच ताब्यात घेण्यात आल्याने लाकडाचा साठा नवापूर येथील काष्ट आगारात आणण्यासाठी दोन टेम्पो व चार पिकअप जीपचा वापर करावा लागला.
वनविभागाच्या कारवाई दरम्यान शेकडोंचा जमाव एकत्रित झाल्याने चित्तथरारक पद्धतीने लोकांच्या जमावातून वाहनात माल भरून कुशलरित्या मुद्देमाल नवापूर काष्ट आगारात जमा करण्यात वनविभागाला यश आले. वावडी गावात प्रथमच अशी धाडसी कारवाई करण्यात आली. आजपर्यंतची ही सर्वात मोठी कारवाई करण्यात आल्याने वनविभागाच्या धाडसाचे कौतुक होत आहे.
कारवाईत सहाय्यक वनसंरक्षक गणेश रणदिवे, नवापूरचे वनक्षेत्रपाल प्रथमेश हाडपे, चिंचपाडा वनक्षेत्रपाल आर.बी.पवार, वनपाल प्रकाश मावची, संजय पाटील, युवराज भाबड, डी.के.जाधव, वनरक्षक अरविंद निकम, भूपेश तांबोळी, कल्पेश अहिरे, एस.डी.बडगुजर, एन.आर. पाटील, अशोक पावरा, एन.टी. थोरात, कमलेश वसावे, प्रशांत सोनवणे, प्रतिभा बोरसे, रेखा गिरासे, आरती नगराळे, दीपाली पाटील, वाहन चालक एस.एस. तुंगार, माजी सैनिक विशाल शिरसाठ, नाना पिंपळे, एस.व्ही.मोरे, आर.एस. कासे यांच्यासह वनमजूर व कर्मचारी सहभागी झालेत.
शहादा उपवन संरक्षक एस.पी.केवटे यांच्या मार्गदर्शनाखाली झालेल्या कारवाईत आंतरराज्य स्तरावर गुन्ह्याच्या पुढील तपासासाठी समन्वय साधला जात असल्याचे गणेश रणदिवे यांनी सांगितले. यासंदर्भात वनक्षेपाल चिंचपाडा आर. बी.पवार यांनी प्रथम अहवाल तयार केला आहे.