वाशी दरोड्यातील 7 गुन्हेगारांना अटक

नवी मुंबई । वाशी सेक्टर 17 मधील कुसुम बिल्डींगमध्ये 27 ऑक्टोबर रोजी दुपारी 12 वाजता दरोडा पडला. अरूण मेनकुदळे हे मुंबई कृषी उत्पन्न बाजार समितीमधील भाजी मार्केटमधील व्यापारी असून त्यांच्या घरी 2 कोटी 9 लाख रूपयांचा हा दरोडा पडला. मेनकुदळे यांच्या सदनिकेसमोर राहणार्या शेजार्यांनी दरवाजात लावलेल्या सीसीटीव्ही कॅमेर्यामुळे दरोडेखोरांच्या चेहर्याचा तात्काळ उलगडा झाला. यात 7 गुन्हेगारांना अटक झाली असून त्यात 2 महिलांचा समावेश आहे. गुन्ह्यात संबंधित असलेल्या अद्यापि 3 फरार गुन्हेगारांचा पोलीस शोध घेत आहेत.

बिहार, युपीमधून केली अटक
या दरोड्याची मुख्य सूत्रधार अनिता मुकुंद म्हसाणे ही खांदेश्‍वर पोलीस ठाण्यातील एका पोलीसाची पत्नी असून तिच्यावर यापूर्वी दोन वेगवेगळ्या पोलिस ठाण्यात गुन्हे दाखल आहेत. अटक आरोपींना मुंब्रा, आंध्र प्रदेश, मिरा रोड, बिहार, उत्तर प्रदेश या ठिकाणाहून अटक करून आणण्यात आकले आहे. या 7 अटक आरोपींमध्ये खुशी जिब्राईल खान आणि जिब्राईल खान या पती-पत्नीचाही समावेश आहे. अवघ्या 12 दिवसात या दरोड्याचा शोध वाशी पोलीसांनी व गुन्हे पथकाने लावला आहे. अजून ऐवज जमा होण्याची शक्यता पोलिसांनी व्यक्त केली आहे.