वाहतूक पोलिसांचे राखी बांधून अनोखे रक्षाबंधन

पुणे । वाहतुकीचे नियम नागरिकांनी पाळावे यासाठी वाहतूक पोलीस काहीना काही शक्कल लढवत असतात. त्याचाच एक भाग म्हणून पुणे व पिंपरी-चिंचवड परिसरात वाहतूक पोलीस सिग्नलवर थांबलेल्या नागरिकांना रक्षाबंधनाचे शुभेच्छा पत्र देत होते. तर सांगवी वाहतूक पोलिसांनी तर नागरिकांना चक्क राख्याही बांधल्या. यावेळी त्यांनी ओवाळणीमध्ये मात्र वाहतूक नियमांचे पालन करणार, अशी हमी नागरिकांकडून घेतली.

जगताप डेअरी, शिवार चौक येथे सांगवी पोलिसांतर्फे हा उपक्रम राबवण्यात आला. यावेळी वाहतूक विभाग पुणे शाखेचे पोलीस उपायुक्त अशोक मोराळे, सहाय्यक पोलीस आयुक्त परिमंडळ तीनचे राजेंद्र भांबरे, सांगवी वाहतूक शाखेचे वरिष्ठ पोलीस निरीक्षक किशोर म्हसवडे, पोलीस मित्र विनीता दाते, घोलप महाविद्यालयाचे प्राचार्य डॉ. निकम, रक्षक शाळा व घोलप महाविद्यालय येथील विद्यार्थी व शिक्षक यांनीही आवर्जून हजेरी लावली होती.

स्वखर्चाने उपक्रम
या उपक्रमाचे वैशिष्ठ्य म्हणजे यामध्ये पोलीस कर्मचा-यांनी स्वतःच्या खिशातील पैसे खर्च करून राख्या व शुभेच्छापत्र बनवले होते. ही कल्पना पुण्याच्या पोलीस आयुक्त रश्मी शुक्ला यांनी मांडली तर वाहतूक पोलिसांनी अगदी तळमळीने ती अमलात आणली.

पाच हजार राख्या व शुभेच्छा पत्र
यावेळी पोलिसांकडून पाच हजार राख्या व पाच हजार शुभेच्छा पत्र सिग्नलवरील नागरिकांना देण्यात आले. नागरिकांसाठी हे सारे नवीन होते. कारण नेहमी वाहतुकीचा नियम मोडला म्हणून दंड ठोकणारे वाहतूक पोलीस आज चक्क त्यांना राख्या बांधत होते. दादा-ताई वाहतुकीचे नियम पाळा, अशी विनंती करत होते. त्यांच्या या उपक्रमाचे नागरिकांनीही कौतुक केले.