विजयस्तंभाला अभिवादन करण्यासाठी येणार्या नागरिकांना सुविधा पुरवा
पुणे । 1 जानेवारी 2018 रोजी विजयस्तंभास अभिवादन करण्यासाठी हवेली तालुक्यातील मौजे पेरणे येथे लाखो नागरिक उपस्थित राहण्याची शक्यता आहे. याठिकाणी येणार्या नागरिकांची गैरसोय होऊ नये, यासाठी संबंधित सर्व विभागांनी काटेकोर नियोजन करून तात्काळ अंमलबजावणी करावी, अशी सूचना पालकमंत्री तथा अन्न व नागरी पुरवठामंत्री गिरीश बापट यांनी दिली.
मौजे पेरणे येथील विजयस्तंभास मानवंदना देण्यासाठी येणार्या नागरिकांसाठी करण्यात आलेल्या उपाययोजनांबाबतची आढावा बैठक व्हीव्हीआयपी सर्कीट हाऊस येथे बापट यांच्या अध्यक्षतेखाली झाली. त्यावेळी उपस्थित विविध विभागाच्या अधिकार्यांना त्यांनी ही सूचना केली. यावेळी सामाजिक न्याय विभागाचे राज्यमंत्री दिलीप कांबळे, आमदार बाबुराव पाचर्णे, पोलिस आयुक्त रश्मी शुक्ला, पोलिस अधिक्षक सुवेझ हक, जिल्हा परिषदेचे मुख्य कार्यकारी अधिकारी सूरज मांढरे, निवासी उपजिल्हाधिकारी राजेंद्र मुठे आदी उपस्थित होते.
नागरिकांना सोयीसुविधा पुरवा
विजयस्तंभास भेट देणार्या नागरिकांना आवश्यक त्या सर्व सोयीसुविधा द्याव्यात. पिण्याचे पाणी उपलब्ध करून देण्यासाठी आवश्यक तेवढे टँकर, फिरते स्वच्छतागृह, रुग्णवाहीका तसेच वैद्यकीय अधिकार्यांचे पथक, अग्नीशमन दलाच्या गाड्या, विद्युत पुरवठा, सीसीटीव्ही यंत्रणा आदी सर्व सुविधा देण्यात याव्यात. वाहतुकीची कोंडी होऊ नये यासाठी पार्किंगची व्यवस्था करावी. आवश्यक असल्यास वाहतुकीच्या मार्गामध्ये बदल करावा. याठिकाणी अनुचित प्रकार घडू नये यासाठी महसूल आणि पोलिस प्रशासनाने योग्य ती खबरदारी घ्यावी. याकरीता पोलिस प्रशासनाने स्वयंसेवकांना प्रशिक्षण देऊन त्यांची मदत घ्यावी, अशा सूचना बापट यांनी यावेळी दिल्या. विविध विभागांच्या अधिकार्यांनी त्यांच्या विभागामार्फत करण्यात आलेल्या उपाययोजनांची माहिती दिली.