विनापरवाना शस्त्र बाळगल्याप्रकरणी अटक

यवत । दौंड तालुक्यातील केडगाव – वाखारी परिसरातून दोन तरुणास बेकायदा बिगर परवाना गावठी कट्टा बाळगल्या प्रकरणी यवत पोलिसांनी ताब्यात घेऊन अटक केली आहे. आतापर्यंत बिगर परवाना गावठी कट्टा बाळगल्या प्रकरणी पोलिसांनी चार आरोपींना अटक करून त्यांच्याकडील तीन रिव्हॉल्व्हर व सात जिवंत काडतुसे जप्त करण्यात आल्याने दौंड परिसरात एकच खळबळ उडाली आहे. या प्रकारामुळे आणखी बिगर परवाना रिव्हॉल्व्हर मिळण्याची शक्यता व्यक्त केली जात आहे.

याप्रकरणी रविंद्र दुर्गा शिंदे (22, रा. दापोडी, दौंड) व सचिन नंदू पानखडे (27, रा. कर्जत, अहमदनगर) असे अटक केलेल्या दोन्ही आरोपींची नावे आहेत. यवत पोलीस ठाण्याचे पोलीस निरीक्षक धन्यकुमार गोडसे यांनी दिलेल्या माहितीनुसार, दि. 11 रोजी रात्री 10 वाजण्याच्या सुमारास पोलीस नाईक गणेश पोटे यांना गुप्त खबर्‍यामार्फत बातमी मिळाली कि, केडगाव गावच्या हद्दीत केडगाव – वाखारी रोडवर कृषी उत्पन्न बाजार समितीच्या कमानी जवळ दोन तरुण संशयित रीत्या फिरत असून त्यांच्याकडे गावठी कट्टा आहे.

या प्रकरणाची खात्री करण्यासाठी पोलीस उपनिरीक्षक राहुल यादव, अविनाश राठोड, पोलीस नाईक गणेश पोटे, सचिन होळकर, मंगेश कदम यांचे पोलीस पथक वाखारी – केडगाव रोडने गेले. यावेळी बाजार समितीकडे जाणारे रोडवर दोन तरुण गप्पा मारत उभे होते. त्यांच्याजवळ अचानक जाऊन त्यांना पकडून अंगझडती घेतली असता त्यांचेकडे एक गावठी कट्टा (रिव्हॉल्व्हर) व दोन काडतूसे मिळून आली आहेत.या दोन्ही आरोपी विरोधात भारतीय हत्यार कायद्यानुसार गुन्हा दाखल करून या दोन्ही आरोपीस अटक केली आहे. यापूर्वीच मंगेश उर्फ योगेश भगवान चव्हाण, परशुराम केरु गडदे यांना बिगर परवाना रिव्हॉल्व्हर बाळगल्या प्रकरणी अटक केली असून आत्तापर्यंत चार आरोपींना अटक करून त्यांच्याकडून 3 गावठी कट्टा व 7 काडतुसे हस्तगत केले आहेत. यापूर्वी (दि.5) रोजी आरोपी मंगेश चव्हाण याने चौफुला येथे भर चौकात शिवाजी बबन पिसे या तरुणावर किरकोळ कारणावरून बिगर परवाना रिव्हॉल्व्हरमधून गोळी झाडीत गंभीर जखमी केले होते. तेव्हापासून हे बिगर परवाना रिव्हॉल्व्हर बाळगणारे रॅकेट उजेडात आले आहे. या रॅकेटाची व्याप्ती मोठी असण्याची शक्यता असून हे रॅकेट शोधून उध्वस्त करण्याचे पोलिसांपुढे मोठे आव्हान असणार आहे. या प्रकरणाचा अधिक तपास पोलीस निरीक्षक धन्यकुमार गोडसे करीत आहोत.