विराट कोहलीचा ‘तो’ सहकारी विकतोय छोले भटुरे

नवी दिल्ली । भारतात क्रिकेट हा खेळ नसून धर्म समजला जातो. देशात क्रिकेटपटूंची अक्षरश: पूजा केली जाते. इथे क्रिकेटर म्हणजे देव समजला जातो. जोपर्यंत क्रिकेटपटूचा फॉर्म आहे, तोवर त्याच्यावर स्तुतीसुमनं उधळली जातात, मात्र फॉर्म हरवल्यानंतर ना तुम्हाला कोणी लक्षात ठेवतं, ना तुमचं कोणी कौतुक करतं. क्रिकेट संघामध्ये स्थान मिळाले नाही तर क्रिकेटपटूंवर कोणती वेळ येऊ शकते हे सांगता येत नाही. 19 वर्षाखालील विश्‍वचषक स्पर्धेमध्ये 2008 साली विराट कोहलीच्या विश्‍वविजयी संघात खेळलेल्या एका खेळाडूवर अशीच वाईट वेळ आली आहे. विश्‍वविजेत्या संघातील या खेळाडूला जगण्यासाठी सध्या रस्त्यावर छोले-भटुरे विकावे लागत आहे. पेरी गोयल असे या क्रिकेटपटूचे नाव आहे. सध्या पेरी गोयलचे छोले भटुरे विकणारे फोटो सोशल मीडियावर व्हायरल होत आहेत. विराट कोहलीच्या भारतीय संघाने 2008 मध्ये 19 वर्षाखालील विश्‍वचषक जिंकला होता. या संघात रवींद्र जाडेजा, मनिष पांडे यासारखे खेळाडू होते. याच संघात पेरी गोयलची राखीव विकेट कीपर म्हणून निवड झाली होती. मात्र त्याला खेळण्याची संधी मिळाली नव्हती.

खराब फॉर्ममुळे बाहेर
2008 हा असा काळ होता, ज्यावेळी महेंद्रसिंह धोनी नव्या भारतीय संघाची बांधणी करत होता. त्याच वर्षी विराटच्या संघाने विश्‍वचषक जिंकला होता. त्यामुळे त्या संघातून विराटसह आणखी नवे चेहरे धोनीला मिळाले. त्यावेळी पेरी गोयलचं नावही चर्चेत होतं. मात्र या विश्‍वचषक स्पर्धेनंतर पेरी गोयलला स्थानिक क्रिकेटमध्ये चमकदार कामगिरी करता आली नाही. त्यामुळे त्याचे नाव मागे पडत गेले. पंजाबकडून खेळणार्‍या पेरी गोयलला मोठी खेळी करता न आल्याने तो संघातूनच बाहेर पडला.

आता छोले भटुरे विकतो
विश्‍वचषकाने पेरी गोयलला हिरो बनवले होते. मात्र क्रिकेटमध्ये सातत्य राखता न आल्यामुळे त्याच्यावर आता छोले भटुरे विकण्याची वेळ आली आहे. सध्या पेरी लुधियाना महापालिकेबाहेर छोले भटुरे विकतो. त्याची ही कहाणी सोशल मीडियावर व्हायरल होत आहे. मात्र त्याचे फेसबुक अकाऊंटवर पाहिले असता, तो एका कंपनीचा संचालक असल्याचे म्हटले आहे. मात्र त्याला अद्याप दुजोरा मिळालेला नाही.