विवाहितेच्या आत्महत्येप्रकरणी पतीसह तिघांवर गुन्हा

वाकड : सासरच्या मंडळीकडून होणार्‍या छळास कंटाळून चेतल हेमकर्ण पवार (वय 25, रा. सेंटोसा पर्ल हौसिंग सोसायटी, वाकड) या विवाहितेने मंगळवार (दि. 8) उंच इमारतीच्या अकराव्या मजल्यावरून उडी मारून आत्महत्या केली होती. याप्रकरणी विवाहितेच्या पतीसह सासू व सासर्‍याविरुद्ध गुन्हा दाखल करण्यात आला आहे. पोलिसांनी चेतल पाटील यांचे पती हेमकर्ण आसाराम पवार (वय 27, रा. सेंटोसा पर्ल हौसिंग सोसायटी, वाकड) याला अटक केली आहे. याबाबत चेतल यांच्या आई भारती पाटील (वय 45, रा. अमळनेर, जि. जळगाव) यांनी फिर्याद दाखल केली आहे. चेतल या अमळनेर येथील माहेरवाशीण होत्या.

टेरेसवरून घेतली उडी
चेतल पवार यांनी फ्लॅटमधील केबल नेटवर्कला काही तरी समस्या आहे, असे कारण सांगून सोसायटीतील सुरक्षारक्षकाकडून टेरेसची चावी घेतली होती. चावी घेऊन त्या टेरेसवर गेल्या. त्यानंतर काही वेळातच जमिनीवर जोरात काहीतरी आदळल्याचा आवाज झाला. त्यामुळे सोसायटीतील इतर सदस्य बाहेर आले. त्यावेळी चेतल पवार जखमी अवस्थेत जमिनीवर विव्हळत पडल्या होत्या. त्यांना तत्काळ उपचारासाठी वाकड येथील एका खासगी रुग्णालयात दाखल करण्यात आले. परंतु, उपचारापूर्वीच त्यांचा मृत्यू झाला होता.

माहेरून पैसे आणण्याची मागणी
चेतल पवार या उच्चशिक्षित होत्या. पाच महिन्यांपूर्वीच फेब्रुवारी महिन्यात त्यांचा आयटी अभियंता असलेल्या हेमकर्णशी विवाह झाला होता. लग्नाच्या काही दिवसानंतर चेतलकडे पती, सासू व सासर्‍याकडून माहेरून पैसे आणण्याची मागणी होऊ लागली. या कारणावरून त्यांचा शारीरिक व मानसिक छळ सुरू केला. या छळाला कंटाळून त्यांनी आत्महत्या केली. सहायक पोलीस निरीक्षक एम. पी. सोनवणे अधिक तपास करत आहेत.