विविध क्षेत्रातील मान्यवरांना श्रद्धांजली वाहून महापालिकेची सभा तहकूब

पिंपरी-चिंचवड :- भाजपचे ज्येष्ठ नेते व राज्याचे कृषीमंत्री पांडुरंग फुंडकर यांच्यासह विविध क्षेत्रातील निधन झालेल्या मान्यवरांना श्रद्धांजली वाहून आज पिंपरी-चिंचवड महापालिकेची मे महिन्याची सभा तहकूब करण्यात आली. हि सभा 20 जून दुपारी एक वाजेपर्यंत तहकूब करण्यात आली आहे.

विविध क्षेत्रातील मान्यवरांना वाहेली श्रद्धांजली
आज पालिकेची मे महिन्याच्या तहकूब सभेचे आयोजन करण्यात आले होते. या सभेच्या अध्यक्षस्थानी महापौर नितीन काळजे होते. राज्याचे कृषीमंत्री व भाजपचे ज्येष्ठ नेते पांडुरंग फुंडकर यांचे नुकतेच निधन झाले आहे. पुण्याच्या पोलीस आयुक्त रश्मी शुक्ला यांचे पती व वरिष्ठ पोलीस अधिकारी उदय शुक्ला, जम्मू-काश्मीर येथील श्रीनगर येथील दहशतवादी हल्लात मृत्यू झालेल्या दोन जवानांना सभेत श्रद्धांजली वाहण्यात आली. नगरसेवक विलास मडेगिरी यांनी श्रद्धांजली वाहून सभा तहकूब करण्याची सूचना मांडली. त्याला नगरसेवक नामदेव ढाके यांनी अनुमोदन दिले.

सभा तहकूब केल्याने प्रस्ताव लांबणीवर
आजच्या महासभेत शिक्षण समितीची स्थापन करून नऊ नगरसेवकांची निवड करण्यात येणार होती. ‘पार्किंग’ पॉलिसीच्या धोरणाला मंजुरी देण्याचा विषय होता. तसेच बोपखेलसाठीच्या मुळा नदीवरील उड्डाणपुलासाठी आवश्यक जागा देण्यास संरक्षण खात्याने सहमती दर्शिवली आहे. त्या जागेची किंमत म्हणून पालिका संरक्षण विभागाला 25 कोटी रुपये देण्याचा प्रस्ताव महासभेसमोर होता. मात्र सभा तहकूब केल्याने 20 जूनपर्यंत हे विषय लांबणीवर गेले आहेत.