विविध सामाजिक संस्थांकडून शाडू मातीपासून मूर्ती बनविण्याचे प्रशिक्षण

पिंपरी-चिंचवड- इको फ्रेंडली गणेशोत्सव साजरा करण्याचे आवाहन नेहमीच केले जाते. प्लास्टर ऑफ पॅरीसच्या गणेश मूर्ती विसर्जनानंतरही कित्येक दिवस पाण्यात विघटित होत नाहीत. त्यामुळे त्यांची विटंबनाही होते. रासायनिक रंगामुळे नद्या, तलाव, विहिरीमधील पाणी प्रदूषित होते. याला रोखण्यासाठीच प्लास्टर ऑफ पॅरीसच्याऐवजी शाडूच्या मातीचा जास्तीत वापर होणे गरजेचे आहे. त्यामुळे घरोघरी शाडू मातीपासून तयार झालेले गणपती स्थापन होतील, तेव्हाच ख-या अर्थाने पर्यावरणाचे तसेच संस्कृतीचे रक्षण होईल. त्यादृष्टीने काही सामाजिक संस्था काम देखील करीत आहे.

पिंपरी-चिंचवड परिसरात अनेक सामाजिक संस्थांनी पर्यावरणपूरक गणेशोत्सव साजरा व्हावा या दृष्टीने शाडू मातीपासून गणेश मूर्ती बनविण्याचे प्रशिक्षण देण्याबाबत कार्यक्रम हाती घेतले. प्लास्टर ऑफ पॅरिसच्या वापरामुळे होणारे पर्यावरणाचे नुकसान टाळण्यासाठी घेण्यात आलेल्या शाडू मातीचे गणपती बनविण्याच्या कार्यशाळेस मोठा प्रतिसाद मिळाला.

महिलांच्या अंगी असलेली कलाकृतीचे प्रदर्शन व्हावे या उद्देशाने सामाजिक संस्थेकडून खास गृहिणींना शाडू मातीपासून गणेश मूर्ती बनविण्याबाबत प्रशिक्षण देण्यात आले.

जळगाव जिल्हा लेवा समाज मंडळ, इसिए पर्यावरण संस्कार केंद्र, निगडी आणि लेवाशक्ती सखी मंच, गगनगिरी विश्व फाउंडेशन, पोलीस नागरीक मित्र, अ.भा.कार्यस्थ सभा,एकता मित्र मंडळ,जिजाऊ महिला बचत गट,दुर्गामाता महीला बचत गट, सिध्दी विनायक महीला बचत गट, संस्कुती महीला बचत गट,विश्व हिन्दु परीषद, ‘द लास्ट ट्रि’ आदी सामाजिक संस्थांनी पर्यावरणाला हातभार म्हणून शाडू मातीच्या मुर्त्या बनविण्यासाठी जनजागृती करत प्रत्यक्षात प्रशिक्षण देखील दिले.