विशेष मतदार नोंदणी मोहीम

जळगाव । जळगाव शहर महानगरपालिकेची पंचवार्षिक निवडणुक सप्टेंबर 2018 मध्ये होणार आहे. या निवडणुकीकरिता भारत निवडणूक आयोगाकडून दिनांक 1 जानेवारी, 2018 या अहर्ता दिनांकावर आधारित मतदार यादी अद्यवायत करणेसाठी 3 ऑक्टोंबर ते 3 नोव्हेंबर, 2017 या कालावधीत पुर्ननिरिक्षण कार्यक्रम हाती घेण्यात येत असल्याची माहिती प्रभारी आयुक्त किशोर राजे निंबाळकर यांनी दिली. सर्व पात्र मतदारांची नावे मतदार यादीत समाविष्ट व्हावी व ज्यांची नांवे वगळणे आवश्यक आहे. यासाठी बुथ लेव्हल ऑफिसर्सची (बी.एल.ओ) नियुक्ती करण्यात आली असून ते सर्व मतदारांच्या घरी येणार आहे. त्यांना नागरीकांनी सर्व ती मदत करुन आपले तसेच आपल्या घरातील सर्व पात्र मतदारांची नांवे मतदार यादीत समाविष्ट करुन घ्यावी, असेही आवाहन यावेळी करण्यात आले.

मतदार यादीतील नावात व पत्ता बदल करण्याची मुभा : नागरीकांनी आपल्या घरातील 1 जानेवारी, 2018 रोजी वय 18 वर्षे पूर्ण होईल अशा सर्व मतदारांची नोंदणी आपल्याकडे येणार्‍या बी.एल.ओ. मार्फत करुन घ्यावी. तसेच घरातील सर्व पात्र मतदारांची नावे विधानसभा मतदार यादीत आहे अथवा नाही याची खात्री करावी नसल्यास नावाची नोंदणी करावी. मतदार यादीतील नावात व पत्ता यामध्ये काही चुक असल्यास त्याची दुरुस्ती करावी. घरातील कोणी सदस्य मयत झालेले असल्यास त्यांचे नाव मतदार यादीतुन वगळून घ्यावे. होस्टेल, रेल्वे, सरकारी, खाजगी कंपनी निवासस्थानात व वसाहतीमध्ये तसेच खाजगी मिळकतीत पूर्वी राहत असलेले भाडेकरी आता घर सोडुन गेले आहेत यांची माहिती देऊन त्यांचे नांव मतदार यादीतून कमी करुन घ्यावे. घरातील सदस्यांचे नाव मतदार यादीत दोन किंवा त्यापेक्षा जास्त वेळा असल्यास एक नाव सोडुन इतर नाव कमी करावे.

कार्यक्रमात सहभागाचे आवाहन
सर्व मतदारांनी मतदार यादी पुर्ननिरिक्षण कार्यक्रमात सहभाग घेऊन मतदार यादी बिनचूक होण्यासाठी मदत करण्याचे आवाहन श्री. निंबाळकर यांनी केले आहे. जळगाव शहर महानगरपालिकेसह राज्यातील धुळे, अहमदनगर, सांगली-मिरज-कुपवाड या महानगरपालिकांच्या निवडणूका सप्टेंबर 2018 मध्ये होणार आहे. या निवडणुकांसाठी मतदार याद्या बिनचूक होण्यासाठी राज्य निवडणूक आयोगाचे आयुक्त जे.एस.सहारीया यांनी आज या महापालिकांच्या आयुक्तांशी व्हिडीओ कॉन्फरन्सद्वारे संवाद साधून करावयाच्या तयारीचा आढावा घेतला. या कॉन्फरन्ससाठी प्रभारी आयुक्त निंबाळकर यांच्यासह उपायुक्त चंद्रकांत खोसे, महापालिकेचे अधिकारी उपस्थित होते.