विहिरीत बुडाल्याने शेतकर्याचा मृत्यू : तारखेड्याची घटना
पाचोरा : तालुक्यातील तारखेडा येथील 48 वर्षीय इसमाचा विहिरीत बुडाल्याने मृत्यू झाला. या प्रकरणी पोलीस स्थानकात अकस्मात मृत्यूची नोंद करण्यात आली. सुखदेव हिलाल पाटील (48) असे मयताचे नाव आहे.
विहिरीत तोल जावून पडल्याने मृत्यू
रविवारी सकाळी 8.30 वाजताच्या सुमारास सुखदेव पाटील हे आपल्या शेतात गेले होते. दुपारी ते पाणी घ्यायला नजीकच्या शेतातील विहिर असलेल्या ठिकाणी गेले मात्र विहिरीतून पाणी काढत असतांना त्यांचा तोल जावुन ते विहिरीत पडले. त्यातच पाण्यात बुडून त्यांचा दुदैवी मृत्यू झाला. ही घटना दुपारी उघडकीस आली. दरम्यान, ते पाणी घेऊन परतले नसल्याने घरच्यांनी त्यांचा सर्वत्र शोध घेत असतांनाच धना अहिरे यांच्या शेतातील विहिरीजवळ सुखदेव पाटील यांचे बुट दिसून आले. विहिरीत शोध घेण्यात आले असता सुखदेव पाटील यांचा मृतदेह आढळला. या घटनेने परीसरात हळहळ व्यक्त करण्यात आली. सुखदेव पाटील यांचा मृतदेह ग्रामीण महाविद्यालय व रुग्णालयात दाखल करण्यात आला. शवविच्छेदन झाल्यावर वैद्यकीय अधिकारी यांच्या खबरीवरून पोलीस स्थानकात अकस्मात मृत्यूची नोंद करण्यात आली. तपास नाईक सूर्यकांत नाईक करीत आहेत. मयताच्या पश्चात पत्नी, तीन मुली, मुलगा असा परीवार आहे.