वीजबिले ऑनलाईन भरण्याकडे बारामतीकरांचा कल वाढतोय

बारामती । महावितरणच्या बारामती मंडलातील जवळपास 26 हजार ग्राहकांनी मागील महिन्यात वीजबिलांपोटी 11 कोटी रुपयांहून अधिक रकमेचा ऑनलाईन भरणा केला आहे. महावितरणने संकेतस्थळासोबतच मोबाईल अ‍ॅपची सुविधा उपलब्ध करून दिल्यानंतर वीजबिले ऑनलाईन भरण्याकडे ग्राहकांचा कल वाढत असल्याची स्थिती आहे.

महावितरणने www.mahadiscom.in या वेबसाईटवर ऑनलाईन बील भरण्याची सुविधा केली असून मोबाईल अ‍ॅप ही सुरू केले आहे. त्यामुळे सर्व लघुदाब ग्राहकांना चालू व मागील बिल पाहणे आणि भरण्यासाठी नेटबँकिंग, क्रेडिट/डेबिट कार्डसह मोबाईल वॉलेट व कॅश काडर्सचा पर्याय उपलब्ध झाला आहे. रांगेत ताटकळत उभे राहण्याऐवजी वेबसाईट व मोबाईल अ‍ॅपवरून वीजबिल भरण्यास ग्राहकांची पसंती वाढलेली आहे.

सासवड विभागात 2 कोटींचा भरणा
जुलै महिन्यात बारामती मंडलात 25 हजार 905 वीजग्राहकांनी 11 कोटी 54 लाख रुपयांच्या वीजबिलांचे ऑनलाईन पेमेंट केले आहे. यात बारामती विभागातील 8 हजार 607 ग्राहकांनी 4 कोटी 92 लाख, सासवड विभागातील 6 हजार 395 ग्राहकांनी 2 कोटी 65 लाख तर केडगाव विभागातील 10 हजार 363 ग्राहकांनी 3 कोटी 97 लाख रुपयांचा ऑनलाईन वीजबिल भरणा केला आहे. या माध्यमातून ग्राहकांना वीजबिल ऑनलाईन भरण्याचे महत्त्व पटत असल्याचे दिसत आहे.

…तर तीन रुपयांची सूट
महावितरणने लघुदाब ग्राहकांना वीजबील ऑनलाईन भरण्यासह ई-मेलद्वारे वीजबील मिळविण्याची सुविधा उपलब्ध करून दिली आहे. तसेच छापील कागदाऐवजी ’गो-ग्रीन’ संकल्पनेअंतर्गत वीजबिलाच्या फक्त ई-मेलचा पर्याय स्वीकारल्यास दरमहा तीन रुपये सूट दिली जात आहे. छापील कागदासह ई-मेलद्वारेही वीजबील मिळविण्याची सोय उपलब्ध आहे. याबाबतची माहिती www.mahadiscom.in या संकेतस्थळावर उपलब्ध आहे. याशिवाय मुदत संपल्यानंतरही विलंब शुल्काच्या रकमेसह वीजबील ऑनलाईन भरण्याची सोय उपलब्ध आहे. महावितरणच्या ऑनलाईन बिल भरण्याच्या सुविधेचा ग्राहकांनी लाभ घ्यावा, असे आवाहन महावितरणच्या वतीने करण्यात आले आहे.