वीजेच्या थकबाकी वसुलीत हयगय केल्यास अधिकार्‍यांवर उगारणार कारवाईचा बडगा
बारामती । थकबाकी वसुलीमध्ये किंवा थकबाकीदार ग्राहकांचा नियमानुसार वीजपुरवठा खंडित करण्याच्या कारवाईत हयगय झाल्यास क्षेत्रीय अधिकारी, कर्मचार्‍यासंह त्यांच्या वरिष्ठ अधिकार्‍यांविरूद्धही कारवाई करण्यात येईल, असा इशारा प्रादेशिक संचालक संजय ताकसांडे यांनी दिला. वीजबिलाची थकबाकी वसुल करण्यासाठी महावितरणने पुणे, सोलापूर, सातारा, सांगली व कोल्हापूर जिल्ह्यांत वीजपुरवठा खंडित करण्याची धडक मोहीम सुरू केली आहे.
थकबाकी वसुली झाली कमी
वीजबिल भरा, अन्यथा थकबाकीमुळे वीजपुरवठा खंडित होणार हा संदेश थकबाकीदारांना या मोहिमेतून गेला पाहिजे. जिल्ह्यात दरमहा वीजबिलांसह थकीत रकमेची वसुली कमी झालेली आहे. थकबाकी वसुलीशिवाय अन्य कोणताही पर्याय राहिलेला नाही. याची महावितरणचे अधिकारी व कर्मचार्‍यांनी गांभिर्याने नोंद घ्यावी, असे ताकसांडे यांनी स्पष्ट केले आहे.
…तर फौजदारी कारवाई
तात्पुरता किंवा कायमस्वरुपी वीजपुरवठा खंडित केल्यानंतरही थकबाकीदार अनधिकृतपणे विजेचा वापर करीत असेल तर त्यांच्याविरुद्ध फौजदारी कारवाई तसेच वीजग्राहकांकडे किती रक्कम थकीत आहे हे न पाहता नियमानुसार वीजपुरवठा खंडित करण्याचे निर्देश देण्यात आले आहेत. थकबाकीदारांनी वीजपुरवठा खंडित करण्याची कटू कारवाई टाळण्यासाठी थकीत वीजबिलांचा त्वरीत भरणा करावा, असे आवाहन महावितरणकडून करण्यात आले आहे. थकीत वीजबिल भरण्यासाठी स्थानिक वीजबील भरणा केंद्रांसह व घरबसल्या ’ऑनलाईन’ पेमेंटसाठी महावितरणची ुुु.ारहरवळीलेा.ळप ही वेबसाईट तसेच मोबाईल अ‍ॅपचा पर्याय उपलब्ध आहे.