वीज बिलाची थकबाकी वसुलीसाठी गेलेल्या कर्मचार्यास मारहाण
जळगाव : वीज बिलाची थकबाकी वसुलीसाठी गेलेल्या महावितरणच्या कर्मचार्यास शिवीगाळ करून धक्काबुक्की करण्यात आली. या प्रकरणी जळगाव शहर पोलिस ठाण्यात संशयीतांविरोधात गुन्हा दाखल करण्यात आला.
बळीराम पेठेत पथकाला धक्काबुक्की
महावितरणचे पथक मंगळवार, 22 फेब्रुवारी रोजी सकाळी 10.30 वाजेच्या सुमारास बळीराम पेठेत थकीत वीजबिल वसुलीचे काम त्यात सहाय्यक अभियंता रोहित गोवे, प्रधान तंत्रज्ञ राकेश वंजारी, वरीष्ठ तंत्रज्ञ सुनील महिरे, वरीष्ठ तंत्रज्ञ वंदना वानखेडे, वरीष्ठ तंत्रज्ञ दिनेश बडगुजर, वरीष्ठ तंत्रज्ञ सागर पाथरवट करीत असताना बळीराम पेठेतील गंगाराम देवरे यांच्या घरातील गणेश वसंत कुलकर्णी या भाडेकरूने पथकातील कर्मचार्यांकडे थकबाकी भरण्यास असमर्थता दाखविली. यानंतर पथकातील वरीष्ठ तंत्रज्ञ सागर पाथरवट यांनी कुलकर्णी यांच्या घराचे वीज मीटर काढून घेत मेन सर्व्हिस वायरदेखील काढून घेतली. यावेळी गणेश कुलकर्णी यांनी पथकास शिवीगाळ केली तसेच हातात दगड घेवून सागर पाथरवट यांच्या अंगावर मारण्यासाठी धावून गेले. कुलकर्णी सोबत असलेल्या दोघांपैकी एका व्यक्तीने सागर यांना धक्काबुक्की करीत चापट मारली व शर्टाचा खिसा ओढून फाडला. तर दुसर्या व्यक्तीने पथकास शिविगाळ करून मारण्याची धमकी दिली. गणेश कुलकर्णी व इतर दोघा अज्ञात व्यक्तींविरोधात शहर पोलिसात गुन्हा दाखल करण्यात आला.