व्हॉटस्अ‍ॅपवरुन पिस्तूलासह काडतुसाची खरेदी- विक्री करणार्‍या रॅकेटचा पर्दाफाश
पोलीस अधीक्षक डॉ. पंजाबराव उगले यांना मिळाली होती माहिती ; तीन पिस्तूल, काडतुसासह दोघांन अटक
जळगाव : सोशल मीडियाच्या माध्यमातून पिस्तुलचे फोटो, काडतूस व त्याची किंमत ठरविली जात असल्याची माहिती थेट पोलीस अधीक्षक डॉ. पंजाबराव उगले यांना मिळाली. त्यानुसार त्यांनी स्थानिक गुन्हे शाखेची यंत्रणा कामाला लावली. स्थानिक गुन्हे शाखेच्या कर्मचार्‍यांनी सोशल मिडीयाचा वापर करुन अवैध गावठी पिस्तुलची खरेदी-विक्री करणार्‍यांचा पर्दाफाश केला आहे.सागर निंबा शेटे (26, रा.शिरुड नाका,अमळनेर) व गुरुचरणसिंग आवसिंग बर्नाला (21, रा.उमर्टी ता.वरला जि.बडवानी,मध्यप्रदेश) या दोघांना अटक करण्यात आली आहे. त्यांच्याकडून तीन गावठी पिस्तुल व काडतूस जप्त करण्यात आली आहेत.
सोशल मिडीयाव्दारे दोघे होते संपर्कात
भुसावळ येथील पाच जणांच्या हत्याकांडात गावठी पिस्तुलचा वापर व त्याचे लागेबांधे मध्य प्रदेशात असल्याचे निष्पन्न झाल्यानंतर पोलीस अधीक्षक डॉ.पंजाबराव उगले यांनी अवैध खरेदी विक्रीचा व्यवहार व त्यात सक्रीय असणार्‍यांच्या शोधासाठी पथक तयार केले होते. सोशल मीडियाच्या माध्यमातून पिस्तुलचे फोटो, काडतूस व त्याची किंमत ठरविली जात असल्याची माहिती डॉ.उगले यांना मिळाली होती, त्यानुसार त्यांनी स्थानिक गुन्हे शाखेचे विजय पाटील व नरेंद्र वारुळे यांच्यावर विशेष जबाबदारी सोपविली होती. त्यांनी गुन्हेगार, पिस्तुल निर्मिती करणारे, त्यांच्या संपर्कातील लोकांचा बारकाईने अभ्यास केला असता सागर व गुरुचरणसिंग यांच्यात सोशल मीडियावर संपर्क झाल्याचे समोर झाले.
या पथकाने केली मोहिम फत्ते
स्थानिक गुन्हे शाखेचे पोलीस निरीक्षक बापू रोहोम यांनी विजय पाटील, नारायण पाटील, रामचंद्र बोरसे, नरेंद्र वारुळे, मनोज दुसाने, दीपक शिंदे, प्रविण हिवराळे, दिनेश बडगुजर, किरण धनगर, महेश पाटील, दीपक छबु पाटील तसेच अमळनेर पोलीस स्टेशनचे शरद तुकाराम पाटील, रवींद्र अभिमन पाटील व मारवड पोलीस स्टेशनचे विजय साळुखे सुनील आगोणे अशांचे संयुक्त पथक तयार करुन उमर्टी , चोपडा , अमळनेर व शिरपुर या भागात तपासकामी रवाना केले होते. या पथकाने 23 नोव्हेंबर रोजी अमळगाव जळोद रोडवरील अमळगाव गावाजवळ गुरुचरणसिंग आवसिंग बर्नाला याला ताब्यात घेवून मोहिम फत्ते केली.
अमळेनरातून पिस्तुलासह एक जीवंत काडतुस जप्त
अटक करण्यात बर्नाला यांच्याकडून 40 रुपये किमतीचे दोन लोखंडी गावठी पिस्तुल जप्त केले होते.
तर सागर निंबा शेटे याच्याजवळून अमळनेर शहरातील गलवाडे रोडवरुन रविवारी तिसरे 25 हजार रुपयाचे पिस्तुल जप्त करण्यात आले. त्याच्यासोबत एक जिवंत पितळी राऊंडही आढळून आले. त्याच्याविरुध्द अमळनेर पोलिसात गुन्हा दाखल करण्यात आला आहे.