शनिवारीही धावणार आता वातानुकूलीत लोकल गाडी

मुंबई । उन्हाळ्याच्या दिवसांत पश्‍चिम रेल्वे प्रशासन मुंबईकरांना सरप्राइज भेट देण्याच्या विचारात आहे. सद्यस्थितीत केवळ सोमवार ते शुक्रवार हे पाच दिवस धावणारी एसी लोकल आता शनिवारीही चालवण्याचा विचार रेल्वे प्रशासन करत आहे. देखभाल-दुरूस्तीसाठी सध्या एसी लोकल शनिवारी, रविवारी चालवली जात नाही.

प्रवाशांची संख्याही वाढतेय
एसी लोकलच्या प्रवाशांमध्ये हळूहळू वाढ होताना दिसत आहे. जानेवारी महिन्यात ही एसी लोकल सुरू झाल्यावर या लोकलमधून 1. 77 लाख प्रवाशांनी प्रवास केला होता. त्यानंतर फेब्रुवारीमध्ये 2 लाख प्रवाशांनी या लोकलमधून प्रवास केला. तर मार्च महिन्यात 3.13 लाख प्रवाशांनी एसी लोकलमधून प्रवास केला.

प्रवासी क्षमता किती?
पूर्वी या लोकलमध्ये दररोज 667 प्रवासी प्रवास करत होते. त्यात वाढ होऊन दररोज 798 प्रवासी एसी लोकलने प्रवास करत आहेत. या लोकलमध्ये 1028 प्रवाशांसाठी बसण्याची सुविधा असून एका एसी लोकलमध्ये एकूण 5964 प्रवासी प्रवास करू शकतात. एसी लोकलमधील तापमान 23 डिग्री सेल्सिअस इतके ठेवण्यात आले आहे. मात्र उन्हाळ्यात बाहेरचे वाढणारे तापमान लक्षात घेता ट्रेनमधील तापमान 21 डिग्री सेल्सिअसपर्यंत खाली आणण्याचा विचार रेल्वे प्रशासन करत आहे. जेणेकरून प्रवाशांना थंडगार प्रवास करता येईल.