शहरात घरफोडीकरून चोरट्यांचा धुमाकूळ

जळगाव । शहरात पोलिसांचा धाक संपला असल्याचे पहावयास मिळत आहे. गेल्या महिन्याभरात 6 पेक्षा अधिक ठिकाणी घरफोड्या झालेल्या असतानाही चोरटे पोलिसांच्या हाती लागलेले नाही. रविवारी मध्यरात्रीच्या सुमारास एसएमआयटी महाविद्यालयाच्या शेजारी असलेल्या दुकानाला आणि बंगल्याला चोरट्यांनी आपले लक्ष्य केले. दुकानाच्या छताचा पत्रा कापून प्रवेश करीत तर बंगल्याचा कडीकोंड तोडून चोरट्यांनी लाखोंचा ऐवज लंपास केला. गेल्या महिन्याभरापासून निवडणुकीच्या बंदोबस्तात असलेल्या पोलिसांमुळे चोरट्यांनी चांगलीच मौज केली. महिन्याभरात शहरात अनेक ठिकाणी किरकोळ आणि मोठ्या घरफोड्या झाल्या. परंतु एकही चोरटा पोलिसांच्या हाती लागला नाही.

मुक्ताईनगर परिसरात असलेल्या एसएमआयटी महाविद्यालयाच्या शेजारी जुने जळगावात राहणार्‍या सुहास प्रभाकर खडके यांचे सुहास प्रोव्हिजन आहे. रविवारी रात्री 9.30 वाजता नेहमीप्रमाणे दुकान बंद करून ते घरी गेले. चोरट्यांनी रात्री त्यांच्या दुकानाच्या छताचा पत्रा कापून दुकानात प्रवेश केला. चोरट्यांनी दुकानातील लोणचे पॅकेट फोडून एका थाळीत टाकले. दुकानात असलेले ब्रेड, पाव आणि टोमॅटो सॉस त्यांनी खाल्ला. चोरट्यांनी जाताना तेलाची कॅन, तेलाचे पाऊच, वेफर्ससोबत घेतले. तसेच गल्ला फोडून त्यामध्ये असलेली रक्कम चोरली.

एसएमआयटी कॉलेजच्या समोर दैनिक लोकशाहीच्या संपादिका शांताताइं वाणी यांचा लोकशाही बंगला आहे. गेल्या आठ दिवसापासून त्या लहान मुलगा निलेश यांच्याकडे पतीसह गेल्या होत्या. रविवारी रात्री 11.57 वाजेच्या सुमारास तोंडाला आणि डोक्याला रूमाल बांधलेल्या दोन युवकांनी कंपाऊंडच्या भिंतीवरून बंगल्यात प्रवेश केला.

चोरट्यांनी बंगल्याच्या पहिल्या माळ्यावर असलेल्या मुख्य दरवाज्याचा कडीकोंडा तोडून घरात प्रवेश केला. दोन्ही बेडरूममध्ये असलेले कपाट फोडून चोरट्यांनी 40 हजार रूपये रोख आणि सोन्याची चेन, चांदीचे भांडे असा ऐवज लंपास केला. चोरट्यांनी घरातील सर्व कपाट, देव्हार्यातील सामान अस्ताव्यस्त केले होते.

लोकशाही बंगल्याला असलेल्या सीसीटीव्ही कॅमेर्यात दोन चोरटे कैद झाले आहेत. एसएमआयटी कॉलेजच्या संरक्षक भिंतीवरून दोन तरूणांनी रस्त्यावर उडी घेतली. बंगल्यात प्रवेश केल्यानंतर दोघांनी तीन कॅमेरे तोडले तर एक कॅमेरा उलट्या बाजूने फिरवला. सीसीटीव्ही कॅमेर्याचा डीव्हीआर बॉक्स खालील माळ्यावर असल्याने त्यात चोरटे कैद झाले आहे.

शांताताई वाणी या गावाला गेलेल्या असल्याने त्यांनी दररोज सायंकाळी घरातील लाईट लावण्याची जबाबदारी गंगुबाई पाटील यांच्यावर सोपविली आहे. रविवारी सायंकाळी 6 वाजता त्यांनी सर्व लाईट सुरू केले होते. सोमवारी सकाळी 7.20 वाजता त्या नातवाला शाळेत सोडविण्यासाठी जात असताना त्यांना लोकशाही बंगल्याच्या बाहेर सीसीटीव्ही कॅमेरा पडलेला दिसला. त्यांनी घरात जावून पाहिले असता चोरी झाली असल्याचे त्यांच्या लक्षात आले. त्यांनी तात्काळ याबाबत राजेश यावलकर यांना कळविले. दरम्यान घटनेची माहिती मिळताच शहर पोलीस ठाणे, जिल्हापेठ पोलीस ठाणे, स्थानिक गुन्हे शाखेच्या पथकाने येवून पाहणी केली. तसेच श्‍वानपथकाचे उपनिरीक्षक सोनुले, कर्मचारी मंगल पारधी, निलेश झोपे यांनी श्‍वान जंजीरसोबत पाहणी केली. जंजीरने सुहास प्रोव्हिजनपासून लोकशाही बंगल्यापर्यंत मार्ग दाखविला. ठसेतज्ज्ञांनी ठसे घेतले असून पुढील तपास सुरू आहे.