शहराला पाणीपुरवठा करणार्‍या धरणात 93.67 टक्के पाणीसाठा
पुणे । शहराला पाणीपुरवठा करणार्‍या खडकवासला, पानशेत, वरसगाव, टेमघर या धरणांच्या पाणलोटक्षेत्रात दोन दिवसांपूर्वी जोरदार पाऊस झाला. त्यामुळे या चारही धरणातील म्हणजे खडकवासला प्रकल्पातील एकूण पाणीसाठा 27.30 टीएमसी (93.67 टक्के) इतका झाला आहे. गेल्या वर्षीपेक्षा यंदा या धरणातील पाणीसाठा सुमारे एक टीएमसीने कमी आहे.
धरणाच्या पाणलोट क्षेत्रात गेल्या काही दिवसांपासून जोरदार पाऊस पडत आहे. त्यामुळे धरणामध्ये यंदा समाधानकारक पाणीसाठा आहे. खडकवासला, पानशेत धरण भरले आहे. खडकवासला प्रकल्पातील या चारही धरणांतील एकूण पाणीसाठा हा 27.30 टीएमसी म्हणजे 93.67 टक्के झाला आहे. गेल्यावर्षी याच दिवशी या चारही धरणातील पाणीसाठा हा 28.70 टिएमसी म्हणजे 98 टक्के होता. गेल्या वर्षीपेक्षा यंदा या धरणातील पाणीसाठा सुमारे एक टीएमसीने कमी आहे. खडकवासला धरणातून मुठा नदीत 428 क्सुसेकने पाणी सोडले जात आहे.